वीरगञ्ज । पर्साको वीरगञ्जमा लागुऔषध अफिम जस्तो देखिने पदार्थसहित चार जना पक्राउ परेका छन् ।

वीरगञ्ज महानगरपालिका–१० स्थित रजतजयन्ती चोकमा नियमित चेकजाँचको क्रममा ना.४६ प २५४० र ना.४० प ६४६९ नम्बरको मोटरसाइकलमा सवार दुई जनासँग लागुऔषध फेला परेपछि थप अनुसन्धानका क्रममा चार जना पक्राउ परेका हुन् ।

वडा प्रहरी कार्यालय विर्ता र लागुऔषध नियन्त्रण ब्यूरो शाखा कार्यालय पर्साबाट खटिएको टोलीले उनीहरूलाई चेकजाँच गर्दा मोटरसाइकलको बीच भागमा राखिएको बोराबाट प्लास्टिकको झोलाभित्र खरानी रंगको टेपले बेरिएको अवस्थामा लुकाइछिपाइ राखिएको करिब १ केजी अफिम जस्तो देखिने पदार्थ फेला पारेको हो ।

पक्राउ पर्नेमा पर्सा पटेर्वासुगौली गाउँपालिका–५ का ३५ वर्षीय रामेश्वर राउत, वडा नं.१ का ४० वर्षीय बिनोद गिरी, ३३ वर्षीय प्रदीप चौधरी र २८ वर्षीय सुनिल कुमार श्रीवास्तव रहेका छन् ।

पक्राउ परेकामाथि लागुऔषध सम्बन्धी कसूरमा पर्सा जिल्ला अदालतबाट पाँच दिनको म्याद थप गरी थप अनुसन्धान भइरहेको प्रहरीले जनाएको छ ।