वीरगंज । चीनमा एक युवतीले धनी बन्नका लागि प्रेमको नाटक र आफ्नो सुन्दरतालाई हतियार बनाएर ८ जना प्रेमीलाई लुटेको घटना सार्वजनिक भएको छ।

२४ वर्षीया यिन शुए नामकी ती युवतीले करोडपति बन्ने योजनाअनुसार धनी पुरुषहरूलाई आफ्नो जालमा पारी उनीहरूको घरबाट महँगा सामान चोर्ने गर्थिन्। तर, नवौं प्रेमीलाई लुट्ने क्रममा उनी रंगेहात पक्राउ परेपछि उनको ठगी धन्दा बाहिर आएको हो।

चीनको हुनान प्रान्तको एक गरिब परिवारमा जन्मेकी यिनले ५ वर्षमा १० करोड रुपैयाँभन्दा बढी कमाएर धनी बन्ने महत्वाकांक्षी योजना बनाएकी थिइन्।

यसका लागि उनले आफ्नो सुन्दरतालाई नै मुख्य हतियार बनाइन्। उनले जागिर छाडेर जम्मा गरेको पैसाले प्लास्टिक सर्जरी गराइन् र आफ्नो रूप नै फेरिन्। त्यसपछि उनले फिटनेस, आकर्षक पहिरन र सभ्य व्यवहार सिकेर आफूलाई उच्च घरानियाँ युवतीको रूपमा प्रस्तुत गर्न थालिन्।

यिनले सामाजिक सञ्जालमार्फत धनी पुरुषहरूलाई निशाना बनाउँथिन्। प्रेमको नाटक गरेर उनी प्रेमीको घरमा बस्न जाने र मौका मिल्नासाथ घरका महँगा सामानहरू, जस्तै डिजाइनर बेल्ट, सोफा, इलेक्ट्रोनिक्स चोरेर भाग्ने गर्थिन्।

चोरेका सामानहरूलाई उनी अनलाइन प्लेटफर्ममार्फत बेच्ने गर्थिन्। केही महिनामै उनले ८ जना प्रेमीबाट करिब ४० लाख नेपाली रुपैयाँ बराबरको सामान चोरेको प्रहरीले जनाएको छ।

उनी आफ्नो नवौं प्रेमीलाई फसाउने चक्करमा थिइन्। उनका प्रेमीले घरमा गोप्य क्यामेरा जडान गरेका थिए। भ्यालेन्टाइन डे कै दिन यिनले घरमा चोरी गरिरहेको दृश्य क्यामेरामा कैद भयो। त्यसपछि उनका प्रेमीले तत्काल प्रहरीलाई खबर गरी उनलाई पक्राउ गराए।

प्रहरीसमक्ष यिनले आफ्नो अपराध स्वीकार गरेकी छन्। उनका अधिकांश पुराना पीडितहरूले भने सामाजिक बेइज्जतीको डरले उजुरी नगरेको बताइएको छ।

अरूलाई लुटेर विलासी जीवनको सपना देखेकी यिन आफैँ भने निकै सामान्य जीवन बिताउँथिन्। उनी दिनमा करिब ५० रुपैयाँ मात्र खर्च गर्ने र होटलको बेसमेन्टमा कोठा भाडामा लिएर बस्ने गरेको अनुसन्धानबाट खुलेको छ।