सिरहा | सिरहा प्रहरीले ठूलो परिमाणमा अवैध सालको काठसहित दुईवटा गाडी नियन्त्रणमा लिएको छ।

वन कर्मचारीकै मिलोमतोमा तस्करी भइरहेको आशंकाबीच प्रहरीले गाडी नियन्त्रणमा लिएको १८ घण्टापछि मात्र वन कार्यालयलाई बुझाउँदा घटना थप रहस्यमय बनेको छ।

इलाका प्रहरी कार्यालय मिर्चैयाले गोप्य सूचनाका आधारमा सोमबार राति करिब १० बजे मिर्चैया-कटारी सडकखण्डको मिर्चैया नगरपालिका-७, फुलबरियाबाट काठ तस्करीमा प्रयोग भएका दुई गाडी नियन्त्रणमा लिएको हो।

सिन्धुलीबाट उदयपुर हुँदै सिरहाको गोलबजारस्थित गौरव सःमिल तथा फर्निचर उद्योगमा ल्याइँदै गरेको म.प्र.०३–००१ च ७१४४ र प्र.१–००१ च ८५९५ नम्बरको पिकअप भ्यानलाई प्रहरीले नियन्त्रणमा लिएको हो।

प्रहरीले गाडीबाट ३३५ थान सालको चिरान काठ बरामद गरेको छ। तर गाडीका चालकसँग रहेको भ्याट बिलमा जम्मा ३३० थान मात्र उल्लेख छ।

बिलमा १ सय २२ क्युबिक फिट काठ देखाइए पनि बरामद काठ करिब ३ सय क्युबिक फिट रहेको व्यवसायीहरूले अनुमान गरेका छन्। यसरी राजस्व छली गर्न थोरै काठको बिल बनाएर ठूलो परिमाणमा तस्करी गर्न खोजेको स्पष्ट हुन्छ।

एक जिल्लाबाट अर्को जिल्लामा काठ लैजान अनिवार्य चाहिने वन कार्यालयको ढुवानी अनुमति पत्र पनि गाडीसँग थिएन।

बरामद काठ गोलबजारका काठ व्यवसायी ‘कारी’ भनेर चिनिने गौरव सःमिलका सञ्चालक श्याम साहको रहेको खुलेको छ। घटनाबारे बुझ्न खोज्दा उनले आफूलाई यसबारे थाहा नभएको भन्दै पछि फोन गर्ने बताए तर सम्पर्कमा आएनन्। स्रोतका अनुसार, साह राति नै इलाका प्रहरी कार्यालय मिर्चैया पुगेर घटनालाई लेनदेनमा मिलाउने प्रयासमा थिए।

प्रहरीले काठ नियन्त्रणमा लिएको लामो समयसम्म पनि वन कार्यालयलाई औपचारिक जानकारी नदिएको डिभिजन वन कार्यालयका प्रमुख शैलेन्द्र मिश्रले बताए। उनले भने, ‘हामीलाई जिम्मा दिएपछि मात्र काठ वैध हो वा अवैध भन्न सकिन्छ।’

अर्कोतर्फ, प्रहरीले काठसहितका गाडी बुझाउन खोज्दा वन कर्मचारीले काठमा लगाइएको सिल तोडिएको भन्दै सोही व्यहोराको मुचुल्का बनाए मात्र बुझ्ने अडान लिएका कारण प्रक्रिया लम्बिएको एक वन कर्मचारीले बताए।

जिल्ला प्रहरी कार्यालय सिरहाका सूचना अधिकारी डीएसपी वीरेन्द्रकुमार पासवानले भने आवश्यक अनुसन्धान तथा कारबाहीका लागि गाडी र काठ डिभिजन वन कार्यालय, लहानलाई बुझाइएको जानकारी दिए।