पर्सा | श्रुति साह । सशस्त्र प्रहरी बल, नेपाल नं. १३ गण हे.क्वा. पर्साबाट खटिएको टोलीले भारतबाट भन्सार छलि ल्याइएको रु. १० लाख १८ हजार बराबरको मल्टिभिटामिन ट्याब्लेट नियन्त्रणमा लिई आवश्यक कारवाहीका लागि भन्सार कार्यालयमा बुझाएको छ।
सशस्त्र प्रहरी निरीक्षक कपिल राज गिरीको कमाण्डमा खटिएको टोलीले वीरगंज महानगरपालिका–१, छप्कैयाबाट भन्सार नतिरी ल्याउँदै गरिएको RIVITROL-CM multivitamin tablet को १०१८ डब्बा बरामद गरेको हो। उक्त औषधि दुईवटा मोटरसाइकलमा लोड गरी वीरगंजतर्फ ल्याइँदै गरिएको सशस्त्र प्रहरीले जनाएको छ।
बरामद गरिएको औषधिसहित सो कार्यमा प्रयोग भएका दुईवटा मोटरसाइकललाई समेत आवश्यक कारवाहीको लागि वीरगंज भन्सार कार्यालय, पर्सा मा बुझाइएको सशस्त्र प्रहरी बलले जानकारी दिएको छ।
सशस्त्र प्रहरी नायव उपरीक्षक तथा सूचना अधिकारी देबेन्द्र बहादुर सिंहका अनुसार अवैध रूपमा भन्सार छल्ने कार्य रोक्न सशस्त्र प्रहरी बलले निगरानी र चेकजाँचलाई अझ कडा बनाएको छ।
