वीरगंज । कृष्ण श्रीवास्तव । भारतको महावाणिज्य दूतावास, बीरगंजले ११ औं अन्तर्राष्ट्रिय योग दिवसको अवसरमा नेपालका विभिन्न जिल्लामा योग कार्यक्रम आयोजना गर्ने भएको छ। “एक पृथ्वी, एक स्वास्थ्यको लागि योग” भन्ने नारासहित मनाइँदै गरिएको यस वर्षको योग दिवसले व्यक्तिगत स्वास्थ्यसँगै पृथ्वीको संरक्षणमा योगको महत्त्वलाई उजागर गर्ने उद्देश्य राखेको छ।

संयुक्त राष्ट्रसंघले २०१४ मा जुन २१ लाई अन्तर्राष्ट्रिय योग दिवसको रूपमा घोषणा गरेपछि हरेक वर्ष विश्वभर यो दिवस विविध कार्यक्रममार्फत मनाइँदै आएको छ। भारत सरकारको पहलमा स्थापना गरिएको यो दिवस अहिले विश्वभर लोकप्रिय बनेको छ। भारतीय प्रधानमन्त्री नरेन्द्र मोदीले उक्त घोषणा क्रममा योगलाई आत्मा, समाज र प्रकृतिसँगको एकताको अभ्यासका रूपमा व्याख्या गरेका थिए।

यसै सन्दर्भमा, भारतीय महावाणिज्य दूतावासले चितवन, मकवानपुर, रौतहट, धनुषा, बारा र पर्सा जिल्लाका प्रमुख स्थानहरूमा स्थानीय निकाय र सरोकारवाला संस्थासँगको सहकार्यमा बिहान ५:३० बजेबाट सुरु हुने योग सत्रहरू आयोजना गर्ने जनाएको छ। भरतपुरको नारायणी नदी किनारदेखि बीरगंजको शंकराचार्य द्वारसम्म सञ्चालन हुने यी कार्यक्रमहरू सबैको लागि निःशुल्क खुला हुनेछन्।

विशेषतः रौतहटको पिपरा भलोहिया र बाराको गढीमाईमा आयोजना हुने कार्यक्रममा स्थानीय पालिकाहरूको सक्रिय सहभागिता रहनेछ। बीरगंजको शंकराचार्य द्वारमा आयोजना हुने अन्तिम योग समारोहमा विशिष्ट अतिथिहरूको उपस्थिति रहने अपेक्षा गरिएको छ।

योगले शारीरिक र मानसिक स्वास्थ्यका साथै जिम्मेवार जीवनशैलीप्रति मानिसलाई जागरूक गराउने विश्वाससहित आयोजना गरिने यी कार्यक्रमहरूले समाजमा सकारात्मक सन्देश प्रवाह गर्ने अपेक्षा गरिएको छ। सहभागीहरूलाई समयमै कार्यक्रमस्थलमा उपस्थित हुन आग्रह गरिएको छ।