नयाँ दिल्ली । बलिउड अभिनेता अक्षयकुमार अभिनित हाउसफुल ५ ले सप्ताहन्तमा राम्रो कलेक्सन गरेको छ । पहिलो दिनदेखि नै अपेक्षाभन्दा बढी कमाई गरेको यो फिल्मका लागि सप्ताहान्तभरि नै सिनेमा घरहरूमा ठुलो भीड देखियो । यसको प्रभाव फिल्मको कलेक्सनमा स्पष्ट रूपमा देखिएको छ । यस वर्ष बलिउडको लागि दोस्रो सबैभन्दा ठुलो ओपनिङ सप्ताहान्त कलेक्सन गरेको हाउसफुल ५ को परीक्षण पहिलो सोमबार हुने ठानिएको थियो । हाउसफुल ५ ले ४ दिनमा शतक पूरा गरेको छ । शुक्रबार २४ करोड रुपैयाँभन्दा बढीको कलेक्सन गर्दै अक्षयको फिल्मले बक्स अफिसमा ओपनिङ गर्याे ।

हाउसफुल ५ ले शनिबार ३२ करोड ३८ लाख र आइतबार ३५ करोड भारुभन्दा बढीको कलेक्सन गर्दै बलियो सप्ताहान्त कलेक्सन गरेको छ । फिल्मको पहिलो सप्ताहान्तको कुल कमाई ९१ करोड ८३ लाख भारु थियो । हाउसफुल ५ ले बक्स अफिसमा पहिलो सोमबार लगभग १४ करोड भारु कमाएको छ । शुक्रबारको हिसाबले हेर्दा सोमबार फिल्मको कमाई आधा पनि घटेको छैन । सोमबारको कलेक्सनसँगै, हाउसफुल ५ ले बक्स अफिसमा १०५ करोडभन्दा बढी कमाई गरेको छ । बक्स अफिसमा १०० करोडको आँकडा पार गर्ने यो अक्षय कुमारको १८ औँ फिल्म बनेको छ ।

४ दिनमा १०५ करोडको कुल नेट कलेक्सनले फिल्मले एक हप्तामा लगभग १३० करोडको आँकडामा पुग्ने सङ्केत गर्छ । दोस्रो सप्ताहान्तको उछाललाई ध्यानमा राख्दै, हाउसफुल ५ ले दुई हप्तामा लगभग २०० करोड भारुको कोशेढुङ्गा पार गर्न सक्छ । रिपोर्टहरूले हाउसफुल ५ को निर्माण बजेट २२५ करोड रुपैयाँ रहेको बताइएको छ । यस्तो अवस्थामा फिल्मले ठुलो सफलता पाउन कम्तीमा ३०० करोडको कोशेढुङ्गा त पार गर्नुपर्नेछ । हालको ट्रेन्ड अनुसार, अक्षयको यस फिल्मले २०० करोड कमाउने निश्चित देखिन्छ । अब हेर्न बाँकी छ कि बलिउडको सबैभन्दा महँगो कमेडी फिल्म हाउसफुल ५ ले ३०० करोड कमाउन सक्छ कि सक्दैन ।