वीरगंज | वीरगन्ज नाकाबाट तेस्रो मुलुकतर्फ नेपाली छुर्पीको निर्यात उत्साहजनक रूपमा बढेको छ। पछिल्ला केही वर्षयता नेपाली छुर्पीले युरोप, अमेरिका, अस्ट्रेलिया तथा क्यानडामा राम्रो बजार बनाउँदै लगेको छ। विशेषगरी घरपालुवा कुकुर र बिरालोको लागि यो उत्पादनको माग उल्लेख्य रूपमा बढ्दै गएको छ।
वीरगन्ज भन्सार कार्यालयको तथ्यांकअनुसार चालु आर्थिक वर्षको साउनदेखि वैशाखसम्मको १० महिनामा ८८ करोड रुपैयाँ बराबरको ४ लाख ९५ हजार ६ सय ८६ किलो छुर्पी निर्यात भएको छ। यस्तै, गत आर्थिक वर्षको सोही अवधिमा ५३ करोड बराबरको २ लाख ९४ हजार २ सय १५ किलो छुर्पी मात्र निर्यात भएको थियो।
छुर्पी भन्सार बिन्दुबाट ‘कुकुर वा बिरालोको खाना’ शीर्षकमा तेस्रो मुलुकमा निर्यात हुने गरेको छ। नेपाली छुर्पी चौपाया प्राणीको हड्डीभन्दा नरम, चपाउन सजिलो र स्वादिलो हुने भएकाले कुकुर तथा बिरालो पालकहरूले मासुको विकल्पका रूपमा यसको प्रयोग बढाउँदै आएका छन्।
भन्सार कार्यालयका सूचना अधिकारी अमित तिवारीका अनुसार, यो वर्ष वीरगन्ज नाकाबाट छुर्पीको निर्यात उल्लेख्य रूपमा वृद्धि भएको छ। उनका अनुसार, “नेपालमा विशेषगरी इलाम, ताप्लेजुङ, संखुवासभा, धनकुटालगायत जिल्लामा उत्पादित छुर्पी वीरगन्ज नाकाबाट तेस्रो मुलुकतर्फ निर्यात हुन्छ।”
इलाममा अहिले छुर्पी उद्योग नै सञ्चालनमा रहेकाले उत्पादन पनि बढी भइरहेको छ। यस्ता निर्यातमा भन्सार शुल्क भने लाग्दैन, केवल प्रत्येक प्रज्ञापनपत्रमा १ सय १३ रुपैयाँ दस्तुर तिर्नुपर्छ।
छुर्पीको बढ्दो निर्यातले नेपालको कृषि र पशुपालन क्षेत्रलाई समेत टेवा पुर्याउने र दीर्घकालीन रूपमा अन्तर्राष्ट्रिय बजारमा नेपाली उत्पादनको छवि बलियो बनाउने सम्भावना देखिएको छ।
