वीरगञ्ज । वीरगञ्ज महानगरपालिका वडा नं. १४ पिपरास्थित रेनुका पेट्रोल पम्प नजिक आइतबार दिउँसो करिब ३:१० बजे भएको कार दुर्घटनामा एक जनाको मृत्यु भएको छ भने तीन जना गम्भीर घाइते भएका छन्।
जिल्ला प्रहरी कार्यालय पर्साका अनुसार गण्डकबाट बसपार्कतर्फ जाँदै गरेको बीआर ५५ बी ९१०४ नम्बरको भारतीय कार अनियन्त्रित भई सडकबीचको डिभाइडरमा ठोक्किँदा दुर्घटना भएको हो।
दुर्घटनापछि घाइते चारै जनालाई उपचारका लागि बारास्थित एलएस न्युरो अस्पताल पुर्याइएको थियो। अस्पतालले करिब ३:५० बजे ३० वर्षीय बिटु सर्राफलाई मृत घोषित गरेको जनाएको छ। उनको टाउको, मुख र कानमा गम्भीर चोट लागेको थियो।
अन्य घाइतेमध्ये ४० वर्षीय चालक गणेश सर्राफ (बेतिया, नरकटियागञ्ज, भारत निवासी) का टाउको र शरीरका विभिन्न भागमा गम्भीर चोट लागेको छ। त्यसैगरी, २० वर्षीय रतन सर्राफको बायाँ हात र शरीरका अन्य भागमा चोट लागेको छ। २१ वर्षीय बिटु सर्राफ (रामबाबु सर्राफका छोरा) को दायाँ खुट्टा, छाती र टाउकोमा गम्भीर चोट रहेको छ।
प्रहरी प्रवक्ता डीएसपी सुवा भट्टका अनुसार दुर्घटनाग्रस्त कारलाई नियन्त्रणमा लिने प्रयास भइरहेको छ भने घटनाबारे थप अनुसन्धान जारी छ।
