वीरगन्ज । वीरगञ्ज महानगरपालिका–१५ स्थित लक्षमनवा टोलमा निर्माणाधीन फारुखे आजम मस्जिदको छतको ढलान कार्य सम्पन्न भएको छ। सो ढलान कार्य वीरगञ्ज महानगरपालिकाका उप–प्रमुख इम्तियाज आलमको विशेष पहलमा सम्पन्न भएको हो।
उप–प्रमुख आलमले मस्जिदको छत ढलानको मसला हालेर कार्यको औपचारिक शुभारम्भ गरेका थिए। मस्जिदको ढलान कार्य सम्पन्न भएपछि स्थानीय बासिन्दाहरू अत्यन्त खुसी भएका छन्। धार्मिक तथा सामुदायिक दृष्टिकोणले महत्वपूर्ण मानिएको फारुखे आजम मस्जिदको निर्माणकार्य अगाडि बढिरहेको देख्दा लक्षमनवा टोलका बासिन्दाहरूले उप–प्रमुख आलमप्रति आभार व्यक्त गरेका छन्।
स्थानीयहरूका अनुसार उप–प्रमुख आलमको यो पहल सराहनीय छ। उनले मुसलमान समुदायप्रति देखाएको चासो तथा सहयोगले समुदायमा सकारात्मक सन्देश प्रवाह भएको छ।
“आउँदा दिनहरूमा लक्षमनवाका लागि अझ केही महत्वपूर्ण र ठूलो सौगात पाउने छौँ भन्ने हामीलाई विश्वास छ,” एक स्थानीय बासिन्दाले बताए।
सो अवसरमा उप–प्रमुख आलमले स्थानीयहरूसँग प्रत्यक्ष संवाद गर्दै भने, “लक्षमनवाका बासिन्दासँग काँधमा काँध मिलाएर अगाडि बढ्न तयार छु। जुनसुकै समयमा तपाईंहरूलाई मेरो आवश्यकता परेमा निःझिझक सम्पर्क गर्नुहोस्। तपाईंहरूको समस्या समाधानका लागि सक्दो प्रयास गर्ने प्रतिवद्धता व्यक्त गर्दछु।”
स्थानीय मुस्लिम समुदायले मस्जिद निर्माण कार्यमा देखाएको चासो तथा समर्थनप्रति प्रसन्नता जनाउँदै आगामी दिनमा समुदायको आवश्यकता अनुसार थप विकास कार्य अघि बढाउने विश्वास व्यक्त गरिएको छ।
