काठमाडौं– जेठ १५ गतेदेखि राजसंस्था फर्काउनका लागि निरन्तर आन्दोलनको घोषणा गरेको जनआन्दोलन परिचालन समितिले प्रधानमन्त्री केपी शर्मा ओलीलाई सडकमा एक्लै हिँडेर देखाउनका लागि चुनौती दिएको छ।

समितिले एक विज्ञप्ति जारी गरी एमालेका कार्यकर्तालाई जेठ १५ गते काठमाडौं कब्जा गर्नका लागि ओलीले आह्वान गरेको विषयप्रति प्रश्न उठाउँदै भन्यो,‘ज्ञानेन्द्र शाहजस्तो त्यहि दिन सडकमा एक्लै हिँडेर देखाऊ।’

समितिका प्रवक्ता स्वागत नेपालले जारी गरेको विज्ञप्तिमा भनिएको छ ‘राजधानी (काठमाडौँ) कब्जा गर्ने प्रधानमन्त्रीको अभिव्यक्तिले उहाँ केवल सुरक्षाकर्मीको कब्जामा रहेर मात्र सुरक्षित हुनुहुन्छ देश अहिले उहाँको कब्जामा छैन भन्ने प्रमाणित गरेको छ। त्यसैले शान्तिपूर्ण संवैधानिक राजसंस्थासहितको व्यवस्थाका लागि आत्मसमपर्ण गर्न पनि हामी सुझाव दिन चाहन्छौँ। राजधानी कब्जा गर्ने अभिव्यक्ति दिने प्रधानमन्त्रीले राजासरह एक्लै सो दिन आफ्ना सुरक्षाकर्मी र पालितपोषित समूहबिना एक्लै सडकमा हिँडेर देखाउन पनि चुनौती दिन चाहन्छौँ।’