वीरगन्ज । लालबाबु सिंह । महालक्ष्मी विकास बैंकले आफ्नो ३१औं वार्षिकोत्सवको अवसरमा महिनाव्यापी कार्यक्रम आयोजना गरी विविध गतिविधिमार्फत उत्सवमय वातावरणमा मनाएको छ।
बैंकले देशभरिका शाखा कार्यालयहरुमार्फत ३१ जना महिला उद्यमीलाई सम्मान गरेको जानकारी प्रेस विज्ञप्तिमार्फत दिएको छ। वित्तीय पहुँच, आर्थिक विकास, सामाजिक प्रगति तथा लैंगिक समानताको प्रवाहमा टेवा पुर्याउने उद्देश्यसहित उक्त सम्मान गरिएको हो।
यस्तै, बैंकले १० वटा शाखा तथा केन्द्रीय कार्यालयमा आयोजना गरेको रक्तदान कार्यक्रममा ३२० पिन्ट रगत संकलन भएको थियो। रगत व्यवस्थापनमा सहजता ल्याउने उद्देश्यले यो कार्यक्रमलाई प्राथमिकता दिइएको बताइएको छ।
वार्षिकोत्सवकै अवसरमा देशको भौगोलिक तथा सांस्कृतिक विविधता झल्काउन बैंकका कर्मचारीहरूलाई स्थानीय भेषभूषामा उपस्थित गराइएको थियो। त्यस्तै, केन्द्रीय कार्यालयमा निःशुल्क स्वास्थ्य तथा आँखा जाँच शिविर सञ्चालन गरिएको थियो।
साथै, बैंकले शाखा, प्रादेशिक तथा केन्द्रीय कार्यालयको सहभागितामा प्रभातफेरी समेत सञ्चालन गरेको थियो, जसमा मोबाइल बैंकिङ, स्मार्ट क्युआर, निक्षेप, कर्जा प्रवाहलगायत बैंकिङ सेवाबारे सन्देशमूलक प्लेकार्ड प्रदर्शन गरिएको थियो।
वार्षिकोत्सवको अर्को महत्वपूर्ण कार्यक्रमको रुपमा बैंकले “महालक्ष्मी कर्पोरेट क्रिकेट लिग २०२५” आयोजना गर्ने जनाएको छ। प्रतियोगिताको चौथो संस्करण काठमाडौंमा २४ टिमको सहभागितामा सम्पन्न हुने जनाइएको छ।
विज्ञप्तिमा वार्षिकोत्सवमा साथ, सहयोग र उत्साह प्रदान गर्ने सम्पूर्ण ग्राहक, शुभेच्छुक र सञ्चारकर्मीप्रति आभार व्यक्त गर्दै भविष्यमा अझ मजबुत सम्बन्धको अपेक्षा गरिएको उल्लेख छ।
