वीरगन्ज | नेपाल खेलकुद महासंघ वीरगन्ज महानगर कमिटीले आज चोर बाटोबाट गरिएको भनिएको महानगर कमिटी गठनप्रति गम्भीर आपत्ति जनाउँदै एक विज्ञप्ति जारी गरेको छ। महासंघका सचिव कृष्ण श्रीवास्तवद्वारा जारी गरिएको उक्त विज्ञप्तिमा वर्तमान कार्यरत कमिटीलाई कुनै जानकारी नदिई, औपचारिक बैठक वा छलफल नगरी गरिएको नयाँ कमिटी गठनलाई अलोकतान्त्रिक, गैरसंवैधानिक र पूर्णतः अस्वीकार्य भन्दै घोर भर्त्सना गरिएको छ।

विज्ञप्तिमा मिति २०८२ जेठ १० गते गरिएको एकपक्षीय निर्णयप्रति गम्भीर आपत्ति जनाउँदै यो प्रक्रिया पूर्णरूपमा अमान्य भएको जनाइएको छ। हाल सक्रिय रूपमा कार्यरत पुरानो कमिटीलाई पूर्णतः बेवास्ता गर्दै गरिएको यो कदमले संस्थाको विधि, मर्यादा र लोकतान्त्रिक प्रक्रियाको उल्लङ्घन भएको सचिव श्रीवास्तवको भनाइ छ। यस कार्यको प्रमुख जिम्मेवार नेपाल खेलकुद महासंघ वीरगन्ज महानगर इन्चार्ज राजबाबु रौनियार रहेको उल्लेख गर्दै विज्ञप्तिमा उहाँमाथि आवश्यक छानबिन गरी उचित कारबाहीको माग गरिएको छ।

साथै, महासंघले नयाँ रूपमा गठन गरिएको भनिएको कमिटीलाई कुनै पनि प्रकारको मान्यता नदिइने प्रष्ट पारेको छ। विज्ञप्तिमा भनिएको छ, “यसमा कुनै औपचारिकता नरहेको कुरा आम जनसमुदाय, खेलप्रेमी, सरोकारवाला पक्ष र केन्द्रीय कार्यालयलाई जानकारी गराउन चाहन्छौं।” विज्ञप्तिको अन्त्यमा सचिव श्रीवास्तवले केन्द्रीय कार्यालयलाई यथाशीघ्र ध्यान दिन र संस्थाको मर्यादा जोगाउन आवश्यक कदम चाल्न आग्रह गरेका छन्।