बारा | पूर्वनिर्धारित तालिकाबिना दैनिक १० घण्टासम्म विद्युत कटौतीको मार खेपिरहेका पथलैया–वीरगन्ज औद्योगिक करिडोरका उद्योगहरु गत सातायता भएको बारम्बार विद्युत कटौतीले अस्तव्यस्त बनेका छन् । बारम्बार अवरुद्ध हुने विद्युतका कारण उत्पादनमा प्रत्यक्ष प्रभाव पर्नेमात्र नभई उद्योगका उपकरण बिग्रिने र कच्चा पदार्थको करोडौं क्षति हुने उद्योग सञ्चालकहरु बताउँछन् । विद्युतकै कारण उद्योग सञ्चालनमा अन्योल सिर्जना भएपछि बारा–पर्सा औद्योगिक करिडोरका उद्योगहरु मारमा परेका हुन् । वीरगन्ज उद्योग वाणिज्य संघका उपाध्यक्ष माधव राजपालले एक सातायता विद्युत आपूर्ति बारम्बार अवरूद्ध हुँदा उद्योगीमा अन्योल बढेको बताए । उनले भने, ‘कुन बेला विद्युत आउने कुन बेला जाने टुंगो छैन, कसरी उद्योगको प्लान्ट सञ्चालन गर्ने ? पूरै करिडोरको औद्योेगिक वातावरण समस्याग्रस्त बनेको छ । विद्युत प्राधिकरणले जति समय बिजुली उपलब्ध गराउने हो, त्यति समय तोकिदियोस् । त्यही समयमा क्वालिटीको विद्युत उपलब्ध गराओस् । नत्र यही अवस्थामा उद्योग सञ्चालन गर्न कठिनाइ हुन्छ ।’
बारम्बार भइरहेको विद्युत आपूर्ति अवरूद्धले उद्योगको उत्पादन प्रणाली नै लथालिंग बनाएको उद्योगीहरु बताउँछन् । कच्चा पदार्थदेखि विभिन्न उपकरणमा क्षति पुग्न थालेपछि धान्न नसकिने भन्दै साना तथा मझौला उद्योगहरुले सञ्चालन समय घटाएका छन् । क्षति बढेसँगै कतिपय ठूला उद्योगले पनि उत्पादन समय निकै घटाएका छन् । करिडोरमा विद्युत वितरण प्रणाली असाध्यै कमजोर बनेपछि उद्योगीमा हैरानी बढेको र औद्योगिक वातारण बिथोलिएको वीरगन्ज उद्योग वाणिज्य संघले जनाएको छ । ‘प्राधिकरणमा नयाँ एमडी आएपछि हामीले लोड म्यानेजमेन्टमा सुधार हुने अपेक्षा राखेका थियौं, तर त्यसो हुन सकिरहेकोे छैन,’ उपाध्यक्ष राजपालले भने, ‘अहिले करिडोरमा चारदेखि दश घण्टासम्म मनलाग्दी विद्युत काट्ने गरेको छ । विद्युत डिमान्डको समय यही हो तर यही समयमा विद्युत नहुनु देशकै लागि घाटा हो ।’ करिडोरका उद्योगहरुले वार्षिक करिब चार अर्ब ५० करोड विद्युत महशुल बुझाउने गरेका छन् । प्राधिकरण सिमरा वितरण केन्द्रका प्रमुख रुपेश रुपाखेतीले करिडोरका उद्योगमा दैनिक १ सय ५० मेगावाटसम्म विद्युत खपत हुने गरेको जानकारी दिँदै अहिले पिक आवरमा विद्युत वितरण गर्न नसकिए पनि समय मिलाएर दिने गरेको बताए ।
विद्युत पटक–पटक अवरुद्ध बन्न थालेपछि करिडोरको क्षेत्रका शहरमा सञ्चालित पाँच तारेदेखि पर्यटक स्तरसम्मका होटल पनि पीडित बनेका छन् । क्लासिक होटल सिमराका प्रबन्धक राज भट्टले विद्युत बारम्बार अवरुद्ध बन्ने गरेपछि गत महिनादेखि जेनेरेटर सञ्चालनमा ल्याएको बताए । यसमा मासिक ३ लाख ५० हजारको डिजेल खपत हुने उनले जानकारी दिए ।
प्राधिकरणले भारतबाट आयात गरिएको बिजुलीले वितरणमा सुधार भएको दाबी गरे पनि साना–ठूला गरी हजारभन्दा धेरै उद्योग सञ्चालित करिडोरका उद्योगीहरूले भने दैनिक दश घण्टासम्म अघोषित लोडसेडिङको मार खेप्नुपरेको बताएका छन् । अनियमित विद्युत कटौतीको बारेमा प्राधिकरणले चासो नराखेको भन्दै उद्योगीहरुले असन्तोष प्रकट गर्न थालेका छन् ।
