जनकपुरधाम | जानकी महिला जागरण समाज, जनकपुरधाम धनुषा र सहयोगी संस्था कानुनी सहायता तथा परामर्श केन्द्रले लैंगिक उत्तरदायी न्याय सम्बन्धी विषयमा वीरगञ्ज महानगरपालिकाका उप–प्रमुख इम्तियाज आलमसँग विशेष छलफल सम्पन्न गरेको छ।

समाजमा बढ्दो महिला माथिको हिंसा र दमनको न्यूनीकरण कसरी गर्न सकिन्छ भन्ने विषयमा केन्द्रित उक्त छलफलमा उप–प्रमुख आलमले वीरगञ्ज महानगरपालिकाबाट आवश्यक सहयोग प्रदान गरिने प्रतिबद्धता जनाउनुभयो। उहाँले समाजमा बढ्दो विकृति र हिंसात्मक प्रवृत्तिहरू नियन्त्रण गर्न महानगरपालिका विभिन्न कार्यक्रममार्फत काम गरिरहेको जानकारी पनि दिनुभयो।

उहाँले लैङ्गिक हिंसा अन्त्य गर्न र पीडित महिलाहरूलाई न्याय दिन स्थानीय न्यायिक समितिमा दर्ता हुने उजुरीहरूको समाधानमा कानुनी सहयोग प्रदान गर्न महानगरपालिका सधैं तयार रहेको बताउनुभयो। साथै, यस्ता अभियानमा आफ्नो पूर्ण साथ र सहकार्य रहने स्पष्ट गर्नुभयो।

छलफल कार्यक्रममा जानकी महिला जागरण समाजका कार्यकारी निर्देशक राजन नेपाल, अधिवक्ता जुली कर्ण, कार्यक्रम संयोजक संजय पौडेल लगायतका व्यक्तिहरूको सक्रिय सहभागिता रहेको थियो। छलफलको जानकारी उप–प्रमुख आलमका प्रेस सल्लाहकार महमद सदाबले दिनुभएको हो।