काठमाडौं । नेकपा (माओवादी केन्द्र) का नेता एवं वरिष्ठ अधिवक्ता रामनारायण बिडारीले सरकारले आगामी आर्थिक वर्षको लागि ल्याएको नीति तथा कार्यक्रमम पुरानै शैलीको रहेको बताएका छन् । आज (शनिबार) नेपाली रेडियो नेटवर्कको नेपाली बहसमा पत्रकार ऋषि धमलासँग संवाद गर्दै उनले सरकारको नीति तथा कार्यक्रम समयसापेक्ष, जनमुखी र वैज्ञानिक नरहेको बताएका हुन् ।

‘सरकारको नीति तथा कार्यक्रममा अधिकांश कांग्रेसीहरुको असहमति भएको जस्तो देखिन्छ । अहिले पनि पुरानै ढाँचा, पुरानै शैलीको अहिले सरकारले ल्याएको नीति कार्यक्रम उपयुक्त, समय सापेक्ष, जनमुखी र वैज्ञानिक छैन भन्ने हामीलाई अनुभूति भएको छ,’– उनले भने ।

सम्पन्न वर्ग, दलाल पुँजीपति वर्ग, विचौलिया र केही भ्रष्ट उद्योगी व्यापारीहरुको पृष्ठपोषण हुनेगरी नीति तथा कार्यक्रम आएको आफूलाई अनुभूति भएको उनले बताए । उनले व्यापार घाटाको सन्दर्भमा सरकारको नीति अस्पष्ट रहेको, राजश्व बृद्धि, भ्रष्टाचारको अन्त्य, रोजगारीको विषयमा सरकारको स्पष्ट नीति आउन नसकेको उनले बताए । देश बनाउन काममा लाग्न छाडेर सरकारमा भएकाहरुले आफ्ना वरिपरी भएका केही भरौटेहरुको पछि लागेको उनको आरोप छ । उनले सरकारको नीति तथा कार्यक्रम अपाङ्ग, अदुरदर्शी, अवैज्ञानिक र जनताको विरुद्धमा रहेको बताए ।