वीरगंज | कृष्णा श्रीवास्तव । झुठा मुद्दा दर्ता गरेर निर्दोष व्यक्तिहरूमाथि बदला लिने प्रयासमा लागेको कथित पत्रकार रञ्जित चौरसियाको योजना उच्च अदालत जनकपुरको अस्थायी इजलास वीरगंजमा विफल भएको छ।

चौरसियाले नभएको घटनालाई बनावटी विवरणसहित अदालतमा पेश गरेर पोखरिया नगरपालिकाका तत्कालीन निमित्त प्रमुख प्रशासकीय अधिकृत अजय श्रीवास्तवसहित पाँच जनाविरुद्ध झुठा मुद्दा दायर गरेका थिए। सामाजिक सञ्जालमा चरित्र हत्या तथा अपशब्द प्रयोग गरेपछि ती पाँच जनाले संयुक्त रूपमा साइबर अपराध अन्तर्गत जिल्ला प्रहरी कार्यालयमा जाहेरी दिएका थिए।

उक्त मुद्दामा फरार रहेका चौरसिया पछि अदालतमा हाजिर भई धरौटीमा रिहा भएका थिए। अहिले पनि सो मुद्दा जिल्ला अदालत पर्सामा विचाराधीन अवस्थामा रहेको छ।

झुठा मुद्दाको प्रतिशोधस्वरूप चौरसियाले आफ्ना बुबा सुबास प्रसाद चौरसियालाई अघि सार्दै झुठाे विवरण र कीर्ते कागजात पेश गरी पुनः मुद्दा दर्ता गराउने प्रयास गरेका थिए। प्रहरीले शुरुमा झुठा विवरणका कारण मुद्दा दर्ता नगरे पनि उच्च अदालतबाट परमादेश आएपछि अनुसन्धानमा जानु परेको जनाएको छ।

स्थानीयका अनुसार चौरसियाका बुबामाथि कुनै प्रकारको आक्रमण भएको थिएन। केही महिना अघि बिन्दवासिनी गाउँपालिकामा भएको पारिवारिक विवादलाई अतिरञ्जित गर्दै रानिघाटको पुल नजिक आक्रमण भएको झुठो विवरण बनाएर मुद्दा चलाइएको हो।

चौरसियाले समाजिक सञ्जाल फेसबुकमा प्रशासकीय अधिकृत श्रीवास्तव, शिक्षक अजित चौरसिया, रन्जित पंडित, पत्रकार अरुण कुशवाहा र वीरगंज टाइम्सका सञ्चालक हरिशंकर शर्मालगायतका विरुद्ध चरित्र हत्या गर्ने, गालीगलौज गर्ने पोस्टहरू गर्दै आएका थिए।

नेकपा (एकीकृत समाजवादी) का केन्द्रीय सदस्य मनोज चौधरीले निर्दोष व्यक्तिहरुलाई फसाउने प्रयासमा संलग्न रञ्जित चौरसिया, उनका बुबा सुबास चौरसिया र योजनाकार राघव साहलाई कानुनी दायरामा ल्याउन कुनै कसर बाँकी नराखिने बताएका छन्।

चौरसियाले पत्रकारको नाममा धाकधम्की, अपशब्द र झुठाे मुद्दा लगाएर बदला लिने प्रयास विफल भएपछि उनी स्वयं कानुनी दायरामा तानिँदै गएका छन्।