वीरगन्ज । येहि चैत ५ गते ठक्करराम बहुमुखी क्याम्पसमा सम्पन्न भएको स्ववियु निर्वाचनमा भएको भनिएको धाँधली, फर्जी नामांकन र अन्य अनियमितताको विषयमा निष्पक्ष छानबिनको माग गर्दै विभिन्न विद्यार्थी संगठनहरूले जिल्ला प्रशासन कार्यालय पर्सामार्फत समिति गठन गरिएको विषयको प्रगति विवरण सार्वजनिक गर्न जोडदार माग गरेका छन्।
विद्यार्थी संगठनहरूको संयुक्त निवेदनमा उल्लेख गरिएअनुसार उक्त घटनापछि छानबिनको लागि जिल्ला प्रशासन कार्यालयको पहलमा समिति गठन गरिएको जानकारी भए पनि हालसम्म समितिले के अनुसन्धान गर्यो, के निष्कर्ष निकालेको छ भन्नेबारे कुनै जानकारी सार्वजनिक गरिएको छैन। समितिले अनुसन्धान सम्पन्न गरेको भए त्यसको प्रतिवेदन वा प्रगति विवरण जनतामाझ ल्याइनुपर्ने उनीहरूको माग छ।
संयुक्त निवेदनमा पारदर्शिता कायम राख्दै प्रतिवेदन तत्काल सार्वजनिक गरिनुपर्ने भन्दै आगामी दिनमा यस्ता गम्भीर विषयमा जनउत्तरदायी र जवाफदेही बन्न राज्य निकायहरूलाई आग्रह गरिएको छ। निवेदनमा अखिल क्रान्तिकारी, स्वतन्त्र युवा समूह, अखिल (छैठौं), नेपाल विद्यार्थी संघ, जय नेपाल विद्यार्थी संघ, समाजवादी विद्यार्थी युनियन लगायतका प्रतिनिधिहरूको हस्ताक्षर रहेको छ।
उनीहरूले निष्पक्षता र जनपक्षीयताको नाममा गरिएको छानबिन कार्यप्रति शंका जनाउँदै यथाशीघ्र विवरण सार्वजनिक नभए आन्दोलनको चेतावनी पनि दिन सक्ने संकेत गरेका छन्।
