काठमाडौँ : काठमाडौँ महानगरपालिकाले विदेशी प्रजातिको कुकुर दर्ता गर्नका लागि २ हजार शुल्क तोकेको छ। महानगरपालिकाले आज सूचना जारी गरी सबै वडा कार्यालयलाई कुकुर र बिरालो पाल्नुअघि दर्ता गराउन निर्देशन दिँदै शुल्कबारे जानकारी दिएको हो। महानगरपालिकाले गत चैत २० गते गोरखापत्र दैनिकमा काठमाडौँ महानगरपालिका क्षेत्रका कुकुर/बिरालोलाई माइक्रोचिपिङ गराई सम्बन्धित वडा कार्यालयमा दर्ता गराएर मात्र पाल्न र माइक्रोचिपिङ लगाएर मात्र विक्री वितरण गर्नु/गराउनु भनी सूचना प्रकाशित गरेको थियो।

महानगरपालिकाका अनुसार काठमाडौँ महानगरपालिकाका कुकुर/बिरालो बन्ध्याकरण, भ्याक्सिनेसन तथा अभिलेखन कार्यविधि, २०८० को अनुसूची (३) मा कुकुर/बिरालोमा धनीको विवरणको ढाँचा रहेकाले सोही बमोजिम नेशनल भेटेरिनरी काउन्सिल प्राप्त डाक्टरबाट पहिचान माइक्रोचिपिङ गराई वडा कार्यालयमा दर्ता गर्ने/गराउने व्यवस्था गराउनुपर्ने छ।

साथै यस विषयमा कुनै दुविधा भएमा काठमाडौँ महानगरपालिका कृषि तथा पशुपक्षी विभागका वरिष्ठ पशु चिकित्सक (दशौं) को ९८५११२९६१७ मा सम्पर्क गर्न सकिने छ। ‘​माइक्रोचिपिङ गराउन काठमाडौँ महानगरपालिकाको ३६ औं नगरसभाबाट अर्थ सम्बन्धित प्रस्तावलाई कार्यान्वयन गर्न बनेको आर्थिक ऐन, २०८१ को पाना नं ८१ र ८६ अनुसार स्थानीय कुकुरको निःशुल्क र विदेशी प्रजातिको प्रतिकुकुर दुई हजार मात्र राजस्व लिई दर्ता गराउने कानूनी व्यवस्था रहेको सोही अनुसार गर्नु/गराउनु हुन अनुरोध गरिन्छ,’सूचनामा उल्लेख छ।