काठमाडौँ । टिकटक लगायत सामाजिक सञ्जालमा आइतबारदेखि एक युवकको भिडिओ भाइरल भइरहेको छ । जहाँ ती युवकलाई दुबईको अलर्कटु भन्ने ठाउँमा नेपालीहरूले फेला पारेको भनिएको छ । ती युवक भाइरल भएपछि प्रतिनिधि सभा बैठकमा समेत उनको उद्दारको लागि पहल गर्न माग गरिएको छ । नेपाली काँग्रेसकी सांसद कान्तिका सेजवालले उद्दारको लागि मङ्गलबार प्रतिनिधि सभाको ध्यानाकर्षण गराएकी हुन् ।
सांसद सेजवालका अनुसार भाइरल भएका युवक मुगुको छायाँनाथ रारा नगरपालिका वडा नं १४ सुम्लि गाउँका दीपराज भण्डारी हुन् । उनी एक वर्ष अघि दुबई गएका थिए । दुबईमा रहेकै समयमा उनी विगत तीन महिनादेखि सम्पर्क विहीन भएका थिए । सांसद सेजवालले भनिन्, “सभामुख मार्फत नेपाल सरकारको सम्बन्धित मन्त्रालयबाट उनको उद्धारका लागि ध्यानाकर्षण गराउन चाहन्छु,” उनले भनिन् । बेपत्ता भएका भण्डारी आफ्नै वडाका स्थानीय बासिन्दा रहेको छायाँनाथ रारा वडा नं १४ का अध्यक्ष जुन बहादुर खड्काले पुष्टि गरे । सम्पर्क विहीन भएदेखि नै परिवारको आग्रहमा खोजीको पहल गर्दै आएको उनले सुनाए ।
वडाध्यक्ष खड्काले भने, “चार महिना पहिले देखि नै उनी सम्पर्क विहीन भएका थिए । दुई महिना पहिले काठमाडौँमा गएर म्यान पावर र परराष्ट्र मन्त्रालयमा पनि बुझेको थिएँ । तर भिसा र पासपोर्ट नभएर केही गर्न सकिएन । दुबईमा एक जना भाइले उहाँलाई भेट्टाउनु भएछ । परराष्ट्र मन्त्रालयमार्फत उनको खोजी गर्न वडा र नगरपालिकाबाट समन्वय गरिरहेका छौँ ।”
