वीरगञ्ज | वीरगञ्ज उद्योग वाणिज्य सङ्घ अन्तर्गतको खुद्रा व्यवसाय समिति संयोजक श्री नरेशकुमार टिवडेवालको सभापतित्वमा खुद्रा व्यवसायीहरूको समस्या र समाधानका लागि वृहद् छलफल सम्पन्न भएको छ।

छलफल कार्यक्रम वीरगञ्जका सम्पूर्ण क्षेत्रका खुद्रा व्यवसायीहरूलाई समेटेर आयोजना गरिएको थियो, जहाँ उनीहरूले सामना गरिरहेका विविध समस्याहरूलाई लिपिबद्ध गर्दै त्यसको उपयुक्त समाधानका लागि छलफल गरिएको थियो।

उक्त कार्यक्रममा सङ्घका अध्यक्ष श्री हरिप्रसाद गौतम, वरिष्ठ उपाध्यक्ष श्री माधव राजपाल, कोषाध्यक्ष श्री अनोज रुँगटा, सचिव श्री प्रेमचन्द्र गोयल, सह-कोषाध्यक्ष श्री निरज अग्रवाल, कार्यसमिति सदस्यहरू तथा वीरगञ्जका विभिन्न क्षेत्रका खुद्रा व्यवसायीहरूको सक्रिय सहभागिता रहेको थियो।

कार्यक्रममा सहभागी व्यवसायीहरूले कर प्रणाली, बजार अनुगमन, सुरक्षाको अवस्था, स्थानीय प्रशासनसँग समन्वय लगायतका विषयमा आफ्ना धारणा राखेका थिए। सङ्घले व्यवसायीहरूका समस्याको स्थायी समाधानका लागि आवश्यक पहल र रणनीति बनाउने प्रतिबद्धता व्यक्त गरेको छ।