वीरगञ्ज । भारतको कश्मीरमा इस्लामिक जिहादीद्वारा हत्या गरिएका नेपाली नागरिकसहित निर्दोष हिन्दू पर्यटकहरूको आत्माको चीर शान्तिको कामना गर्दै वीरगञ्जमा आयोजित श्रद्धाञ्जली कार्यक्रम सम्पन्न भएको छ।

तराई मधेश महिला फाउन्डेशन नेपाल, वीरगञ्ज–पर्साको आयोजनामा हिजो बेलुका करिब ६ बजे वीरगञ्जको घण्टाघरमा श्रद्धाञ्जली सभा गरिएको हो। कार्यक्रममा स्थानीय समुदाय, सामाजिक अभियन्ता तथा विभिन्न संघसंस्थाका प्रतिनिधिहरूको उल्लेख्य उपस्थिति रहेको थियो।

“हिन्दुहरुको न्यायका लागि एक हौं” र “इस्लामिक जिहादी विरुद्ध एक हौं” भन्ने नारासहित सम्पन्न कार्यक्रममा हत्या गरिएका हिन्दू पर्यटकहरूको सम्झनामा दियो बाली श्रद्धाञ्जली अर्पण गरिएको थियो। उपस्थित सहभागीहरूले शान्तिपूर्ण र एकीकृत ढंगले घटना विरुद्ध आवाज उठाउँदै दोषीलाई कडा कारबाहीको मागसमेत गरेका थिए।

कार्यक्रममा तराई मधेश महिला फाउन्डेशन नेपालका प्रतिनिधिहरूले आतङ्कवादविरुद्ध जागरुकता फैलाउन निरन्तर अभियान सञ्चालन गर्ने प्रतिबद्धता व्यक्त गरे। कार्यक्रम समापनसँगै सहभागीहरूले सांकेतिक मौनधारण गरी मृतकप्रति श्रद्धाञ्जली अर्पण गरेका थिए।