वीरगन्ज । गुणस्तर तथा नापतौल कार्यालय बिरगंजले स्थानीय मीना बजार कम्प्लेक्समा नापतौल सम्बन्धी जनचेतना तथा अन्तरक्रिया कार्यक्रम आयोजना गरेको छ। बजारमा बढ्दो उपभोक्ता गुनासोलाई मध्यनजर गर्दै आयोजना गरिएको कार्यक्रममा करिब ८० जना व्यापारीहरूको सक्रिय सहभागिता रह्यो।

कार्यक्रममा नापतौल कार्यालय बिरगंजले व्यापारी र उपभोक्तालाई नापतौलसम्बन्धी विभिन्न महत्वपूर्ण सूचनाहरू प्रदान गरेको थियो। कार्यालयले निम्न अनुरोधहरू प्रस्तुत गर्दै जनचेतना फैलाएको छ:

तौल गरि सामान खरिद गर्दा नापतौल यन्त्र बाहेक अन्य अवैध सामग्रीजस्तै ढुंगा, इँटा, भारतीय ६ कुने ढक, काठको डण्डी आदि प्रयोग गरेर तौल गर्ने व्यापारीबाट सामान नकिन्न उपभोक्तालाई आग्रह गरिएको छ।

सामान तौल गर्दा प्रयोग हुने यन्त्र नापतौल कार्यालयबाट प्रमाणित गरिएको छ कि छैन भनी सोधपुछ गर्न, साथै तौल गर्नु अघि यन्त्र शून्य गरिएको छ कि छैन हेर्न उपभोक्तालाई सुझाव दिइएको छ।

सुनचाँदी जस्ता बहुमूल्य धातु खरिद गर्दा तोला, आना, मासा, रति जस्ता परम्परागत इकाइमा विश्वास नगरी, ग्राम वा मिलिग्राममा तौल गरी खरिद गर्न र सुनको शुद्धताको प्रमाणिकरणसहित खरिद बिल लिन उपभोक्तालाई अनुरोध गरिएको छ।

कार्यक्रममा नापतौल कार्यालय बिरगंजका निरीक्षक हरिभजन त्रिपाठी, सहायक निरीक्षक आनन्द कुमार गुप्ता, सि.मि. मनिष कुमार गुप्ता र ज्याउद्दिन अंसारीले आफ्ना धारणा व्यक्त गरेका थिए। त्यस्तै, बजारको प्रतिनिधित्व गर्दै अरबिन्द साह कलवार, आशिष गुप्ता तथा स्थानीय व्यापारीहरूको उल्लेखनीय उपस्थिति रहेको थियो।

कार्यक्रमले बजारमा निष्पक्षता कायम राख्न, उपभोक्ता अधिकार संरक्षण गर्न तथा नापतौल प्रक्रियामा पारदर्शिता ल्याउन महत्वपूर्ण योगदान पुर्‍याउने अपेक्षा गरिएको छ। आगामी दिनहरूमा यस्ता कार्यक्रमलाई अझै व्यापक बनाइने कार्यालयले जानकारी दिएको छ।