वीरगंज । वीरगंज महानगरपालिकाभित्र अझैं पनि बालबालिकालाई चरम श्रम शोषणसहित काममा लगाएको पाइएको छ। मुख्यत: महानगरभित्रका होटेल, रेस्टुरेन्ट, मदिरा पसल, मासु पसल, फलफूल पसल लगायतका व्यवसायिक क्षेत्रमा बालश्रमिकको संख्या अधिक देखिएको छ। यसरी श्रम गर्न बाध्य बालबालिकाहरू निम्न आयस्तर भएका परिवारका हुन्।
सामुदायिक संस्था सानो पाइला (A Little Step) ले प्रारम्भिक अध्ययनपछि वीरगंज महानगरपालिका भित्र बाल श्रम अन्त्य हेतु ‘बाल श्रमिकको उद्धार तथा दिगो व्यवस्थापन’ अभियान सुरु गरेको छ। अभियान अन्तर्गत मिति २०८१।१२।२७ गते बुधबारका दिन वीरगंज महानगरका विभिन्न ठाउँमा काम गरिरहेका १७ जना बाल श्रमिकको उद्धार गरिएको छ। जसमध्ये बुधबार र विहीबार गरी १२ जना बालकलाई अब उप्रान्त श्रममा नलगाउने प्रतिबद्धतासहित परिवारको जिम्मा लगाइएको छ। परिवार पत्तो नलागेका बाँकी ५ जनालाई सानो पाइलाद्वारा संचालित बाल गृह ‘सानो घर’मा आश्रय दिइएको छ।
यसरी उद्धार गरिएका अधिकांश बालकहरूले आफूहरू बिहान सबेरैदेखि मध्यरातसम्म काम गर्न बाध्य भएको हामीलाई बताएका छन्। उद्धार गरिएका एक बालकले हामीसँग भने, ‘विहान ५ बजेदेखि मध्यरातिसम्म मैले त्यहाँ जुठो भाँडा माज्नुपर्थ्यो।’ उद्धार गरिएका बालकहरू ८ वर्षदेखि १५ वर्ष उमेर समूहका हुन्। जसमध्ये केही भारतीय हुन्। जो कामका लागि वीरगंज आएका आफ्ना अभिभावकहरूसँग आइपुगेका हुन्।
वीरगंज महानगरपालिका, प्रहरी-प्रशासन, श्रम तथा रोजगार कार्यालय, छोराछोरी नेपाल लगायतका प्रतिनिधिहरूको उपस्थिति तथा सहयोगमा श्रमिक बालकहरूको उद्धार गरिएको हो।
परिवारको जिम्मा लगाइएका बालकहरूको बालअधिकारको रक्षासहित परवरिस गर्ने व्यवस्था मिलाउन हामी सकारात्मक छौं। र, यसका लागि उपयुक्त उपाय के हुन सक्छ भन्नेमा सरोकारवालाहरूसँग निरन्तर छलफलमा रही उचित पहलकदमी लिन हामी प्रयत्नरत छौं। त्यस्तै उद्धार गरिएका बालकहरू, जसका अभिभावक भेटिँदैनन, उनीहरूको उचितरूपमा दीर्घकालीन व्यवस्थापनको बाटो पहिल्याउन समेत हामी प्रतिबद्ध छौं।
