जनकपुरधाम | प्रधानमन्त्री केपी शर्मा ओलीले राजावादी आन्दोलनमा तोडफोड गर्ने, आगजानी गर्ने कसैलाई नछाड्ने बताएका छन्।
मंगलबार मधेस प्रदेशसभामा विशेष सम्बोधन गर्दै प्रधानमन्त्री ओलीले अहिलेको सरकारले गलत क्रियाकलाप गर्ने जो कोहीलाई कानुनी कारबाहीको दायरमाा ल्याउने बताएका हुन्।
‘चुनावबाट केही गर्न नसक्ने एकथरी तत्व छ, जो आगजानी गरेर, मान्छे मारेर, ढुंगा हानेर, तोडफोड गरेर, औषधि कारखाना जलाएर, व्यक्तिका घरहरु, व्यवसायहरु, सञ्चारमाध्यमको कार्यालयमा तोडफोड गरेर, व्यक्तिका घर जलाएर वितण्डा मच्चाएर दुई चार हजारको वितण्डालाई समाजले ग्रहण गर्दैन’, उनले भने।
प्रधानमन्त्री ओलीले यस्ता कुरा सभ्य समाजमा स्वीकार्य नहुने भन्दै यो अत्यन्त गलत क्रियाकलाप रहेकाले यसमा संलग्न जोकोही भए पनि कानुनी कारबाहीको दायरमा आउने बताए।
‘अहिलेको सरकार कसैलाई कारबाही गर्दा आग्रह पूर्वाग्रह गर्ने होइन। यसलाई कारबाही गर्नैपर्छ भनेर गर्दैन र छोडनै पर्छ भनेर छोडदैन। कानुनभन्दा माथि पनि कोही हुँदैन’, उनले भने।
प्रधानमन्त्री ओलीले निर्दोष मान्छेलाई प्रतिशोधस्वरुप कारबाही गरिरहेको हल्लामा कुनै सत्यता नरहेको दाबी गरे। उनले भने, ‘जसरी हल्ला गरिन्छ त्यस्तो यो सरकार गर्दैन। प्रतिशोध अहिलेको सरकारको लागि सिद्धान्त, आचरणविपरीतको कुरा हो।’
प्रधानमन्त्री ओलीले अहिलेको प्रणाली सर्वश्रेष्ठ प्रणाली रहेको जिकिर गरे। उनले विविधताको बीचमा एकता गर्दै सामाजिक न्याय र समान्ताको सिद्धान्तमा आधारित भएर सहभागितामूलक, समावेशी, समानुपातिक प्रणाली लिएको र त्यसलाई अझ प्रभावकारी बनाउँदै अगाडि जानुपर्ने बताए।
