काठमाडौँ | राजावादीको हिंसात्मक झडपले काठमाडौंमा थुप्रै सर्वसाधारणको मनमा गहिरो घाउ छाडिरहेकै बेला काठमाडौं विमानस्थलको पार्किङमा राखिएको ‘नेसनल जियोग्राफिक’ लेखिएको बोइङ-७५७ विमानले यो साता धेरैलाई उत्सुकता जगाइदियो ।

वायु प्रदूषणले काठमाडौंको आकाश धुम्मिए पनि विमानस्थलको एप्रोनमा राखिएको नेसनल जियोग्राफिकको जहाज भने पहेँलो रंगको ब्रान्ड नाम र लोगोले टाढैबाट चम्किएको थियो । झडप र प्रदूषणले काठमाडौं अशान्त भइरहेका बेला अमेरिकाबाट आएको त्यो जहाजले भने नेपाली पर्यटन व्यवसायीहरूका लागि खुसीको बहार नै ल्याइदिएको थियो ।

अमेरिकाको सियाटल राज्यबाट एक महिनाका लागि विश्व-भम्रणमा निस्किएका ७७ जना अमेरिकी धनाढ्य पर्यटक शुक्रबार काठमाडौंमा उत्रिएका थिए । उनीहरूको उद्देश्य काठमाडौंको कला, संस्कृति र सम्पदाको अवलोकन गर्ने मात्रै थियो ।

‘जहाजमा काठमाडौंमा उत्रिएका ती सबै अमेरिकी पर्यटक थिए’, भ्रमणको नेपालमा व्यवस्थापन गर्ने यति होलिडेजका कार्यकारी निर्देशक हेमन्त कोलाक्षपतिले भने,‘उनीहरू अधिकांश नेसनल जियोग्राफिकलाई आर्थिक सहायता गर्ने धनी अमेरिकी नागरिक र नेसनल जियोग्राफिकबाट अवकासप्राप्त कर्मचारी थिए ।’ उनीहरूको यात्राको जिम्मा अमेरिकी ट्राभल कम्पनीले भारतको भेनटुर्स एभिएसन प्रालिमार्फत नेपालमा यतिलाई दिएको थियो ।

शुक्रबार बिहान सवा ११ बजे काठमाडौंमा उत्रिएलगत्तै ७७ जनै बौद्ध पुगे । महँगा पेन्टिङ, पस्मिना र सिंगिङ बाउल किने । दिउँसो सबै बत्तीसपुतलीमा रहेको पाँचतारे होटल द्वारिकाज् आए, नेपाली खाना खाए । दिउँसो भक्तपुर दरबारको अवलोकनमा गए । शनिबार बिहानै भने केही पशुपति घुम्न निस्किए । शनिबार दिउँसै उनीहरू भुटान एयरलायन्सको विमानमा पारो उत्रिए ।

‘अमेरिकाबाटै चार्टर गरेर ल्याइएको बोइङ–७५७ भुटानमा अवतरण गर्न नसकिने भएपछि उनीहरू भुटान एयरलायन्समा गएका हुन्,’ कार्यकारी निर्देशक कोलाक्षपतिले कान्तिपुरसँग भने । सोमबार बिहान भुटानबाट फर्केका उनीहरू दिउँसो साढे १ बजे त्यही चार्टर बोइङ चढेर काठमाडौंबाट भारतको वाराणसी हुँदै आग्रा फर्केका छन् । त्यसपछि उनीहरू कम्बोडिया, थाइल्यान्ड, बेलायत हुँदै अमेरिका फर्किने तालिका रहेको छ ।

नेपाल एसोसियसन अफ टुर एन्ड ट्राभल्स एजेन्ट्स (नाट्टा) का अध्यक्ष कुमारमणि थपलियाका अनुसार, गुणस्तरीय सेवा र अनुभवका लागि सुविधासम्पन्न होटलको खोजी गर्दै नेपालमा प्राय: विरलै लक्जरी पर्यटक (हाई–इन्ड) पर्यटक आउने गर्छन । ‘स्तरीय सडक, उडानको सुनिश्चिता र गुणस्तरयुक्त पर्यटकस्तरीय पूर्वाधारमा लगानी थपिएमा नेपालमा यस्ता खाले पर्यटक आउने धेरै सम्भावना छ,’ अध्यक्ष थपलियाले भने, ‘उनीहरूले गर्ने खर्च पनि अरुको भन्दा धेरै नै हुन्छ ।

यति होलिडेजका अनुसार यो विमान काठमाडौंमा रहँदा काठमाडौं विमानस्थललाई पार्किङलगायतका शुल्क नै दैनिक ८ लाख रुपैयाँ बुझाएको छ । त्यस्तै होटल बसाइ र खानपानमा पनि उक्त समूहले दैनिक ४० देखि ४५ हजार डलर (६१ लाख हाराहारी) खर्च गरेको कोलाक्षपतिले बताए ।