नयाँ दिल्ली । ‘पुष्पा २’ को सफलताले दक्षिण भारतीय सुपरस्टार अल्लु अर्जुन निकै खुसी छन् । फिल्मको उत्कृष्ट बक्स अफिस प्रदर्शनले कयौं फिल्मको रेकर्ड त तोड्यौ नै अल्लु अर्जुनलाई भारतको सबैभन्दा शक्तिशाली स्टारहरू मध्ये एक पनि बनायो ।
निर्देशक सुकुमारको उत्कृष्ट निर्देशन र अल्लु अर्जुनको शानदार अभिनयले एउटा यस्तो बेन्चमार्क स्थापित गरेको छ, जसलाई भेट्न कयौं चलचित्रका लागि असम्भव हुनेछ ।
यस्तैमा अभिनेताले आफ्नो नाम फेर्न लागेको चर्चा चलिरहेको छ । कोइमोई र सिने जोशमा छापिएको खबरकाअनुसार अल्लु अर्जुनले एक संख्याशास्त्रीको सिफारिसको आधारमा आफ्नो नाममा दुई ‘यु’ र दुई ‘एन’ थप्ने सम्भावना खोजिरहेका छन् । उनको सफलतालाई अझ बढाउन र करियरलाई बलियो बनाउन यो कदम चालिएको विश्वास गरिएको छ । यद्यपि, यी दावीहरूको आधिकारिक पुष्टि अहिलेसम्म भएको छैन ।
अल्लु अर्जुन आफ्ना आगामी प्रोजेक्टहरूका कारण पनि चर्चामा छन् । उनका सबैभन्दा प्रतिक्षित चलचित्रहरू मध्ये एक एटलीको निर्देशनमा बन्न लागेको प्यान–इन्डिया चलचित्र हो । हाललाई ‘एए२२’ नाम दिइएको फिल्मको घोषणा अल्लु अर्जुनको जन्मदिन अप्रिल ८ मा हुने अपेक्षा गरिएको छ ।
पिंकभिल्लाको रिपोर्टअनुसार, अभिनेताले यस परियोजनाको लागि मोटो पारिश्रमिक लिएका छन् ।
‘पुष्पा ३’को पर्खाइमा छन् फ्यान
अल्लु अर्जुन निर्देशक त्रिविक्रम श्रीनिवाससँग मिलेर एउटा एपिक परियोजनामा पनि काम गरिरहेका छन् । श्रीनिवाससँग अल्लुको यो चौथो फिल्म हो । यस फिल्ममा अल्लु अर्जुनले भगवान कार्तिकेयको भूमिका निर्वाह गर्ने अफवाह चलेको छ । महाकाव्य विधाको यो फिल्म रामायण र महाभारत भन्दा धेरै फरक हुने निर्माता नागा वंशीले एक कार्यक्रममा भनेका थिए ।
यो फिल्म भव्य स्तरमा बनाइँदैछ र तेलुगु सिनेमामा पहिले कहिल्यै नदेखिएको सिनेमाई अनुभव यसमा पाइनेछ । फ्यानहरू अल्लु अर्जुन र सुकुमारको ‘पुष्पा ३’ को पनि व्यग्र प्रतिक्षामा छन् ।
