बारा | सिकिन्द्र साह | बारा जिल्लाको सिम्रौनगढ नगरपालिका स्थित कंकाली मन्दिर नजिक बिना फाउन्डेसन द्वारा आयोजित इतिहास सम्बन्धी विशेष कार्यक्रम आजदेखि सुरु भएको छ। कार्यक्रमको उद्घाटन मधेश प्रदेशका मुख्य मन्त्री सतीश कुमार सिंह ले पानसमा बत्ती बालेर गर्नुभएको हो।

बिना फाउन्डेसनका संस्थापक ममता शर्मा ले जानकारी दिँदै चैत्र १५, १६ र १७ गते इसरा पोखरी नजिक कार्यक्रम आयोजना गरिने बताउनुभयो। यस कार्यक्रममा सिम्रौनगढको इतिहास, संस्कृति, तिरहुत राज्य, साथै इतिहास संरक्षणका चुनौतीबारे छलफल गरिनेछ। साथै रानीवास मन्दिरको वरिपरि विकास गतिविधि सम्बन्धमा समेत तीन दिनसम्म समसामयिक विषयहरूमा गहन विचार-विमर्श गरिनेछ।

मुख्यमन्त्री सतीश कुमार सिंहले कार्यक्रममा बोल्दै यस वर्ष प्राकृतिक सौन्दर्यकरणको गुरुयोजना अन्तर्गत जनकपुर, सप्तरीको छिनमस्ता मन्दिर तथा सिम्रौनगढको तलेजु भवन निर्माण योजनामा समावेश गरिने जानकारी दिनुभयो। साथै, मधेश प्रदेशमा सुशासन कायम राख्न सरकार प्रतिबद्ध रहेको बताउँदै स्थानीय सरकारलाई सिम्रौनगढको ऐतिहासिक सम्पदा संरक्षणमा ध्यान दिन आग्रह गर्नुभयो। साथै, डिटिएल मास्टर योजना प्रदेश सरकारमा पेस गर्न नगर प्रमुख किशोरी साह कलवार लाई समेत अनुरोध गर्नुभएको छ।

कार्यक्रममा पूर्व खेलकुद मन्त्री बिराज भट्ट श्रेष्ठ, विभिन्न मिडिया प्रतिनिधिहरू, स्थानीय बासिन्दाहरू तथा अन्य विशिष्ट व्यक्तिहरूको उपस्थिति रहेको थियो।