वीरगंज । वीरगन्जमा गहवमाई माताको दोस्रो डोली यात्रा यहि चैत २३ गते निकालिने भएको छ । वीरगन्जको प्रमुख शक्तिपिठ गहवामाई मन्दिरबाट गत वर्षदेखि गहवामाई माताको डोली यात्रा निकाल्न थालिएको हो ।

यस वर्षपनि चैत २३ गते शनिबारका दिन गहवमाईको दोस्रो डोली यात्रा निकाल्न लागिएको माईस्थान मन्दिर सञ्चालक समितीका अध्यक्ष्ँ नरेन्द्र साहले जानकारी दिए ।

चैत २३ गते अर्थात चैते दशैंको अष्टमीका दिन निकालिने डोली यात्राका लागि तयारी सुरु भइसकेको जानकारीपनि उनले दिए । उनका अनुसार, चैत २३ गते शनिबारका दिन अपरान्ह ४ बजे गहवामाई मन्दिरको प्रांगणबाट निशानसहित गहवामाईको डोली यात्रा सुरु हुनेछ । त्यसअघि दिउँसो २ बजे गहवामाईको डोली र निशानको विशेष पूजा हुनेछ । त्यसपछि २ नम्बर रोड,वीर्ता मन्दिर हुदैं त्यहाँँबाट अलखीयामठ, महावीरस्थान, माईस्थानको चोक परिक्रमा गर्दै डोली यात्रा पुन गहवामाई मन्दिर प्रांगणमा पुगेर समापन हुनेछ ।

डोली यात्रापछि शनिबार नै साँझ गहवमाई मन्दिर अगाडि महाआरतीको कार्यक्रम रहेको अध्यक्ष साहले बताए । डोली यात्रामा सहभागी हुने भक्तजनहरुलाई गहवामाईको तस्बिर अंकीत निशान यसपालिपनि वितरण गरिनेछ । डोली यात्राको सहयोग स्वरुप प्रति निशानको शुल्क ३ सय ५० रुपैयाँ तोकिएको साहले बताए । अध्यक्ष साहका अनुसार, गत वर्षको पहिलो डोली यात्रामा ६ सय ५० वटा निशान वितरण गरिएको थियो।