वीरगञ्ज । वीरगञ्जको मुख्य सडक २५/२५ मिटर विस्तारको विरोधमा घरधनी र व्यवसायीहरू आन्दोलित भएका छन् । उचित मुआब्जा माग्दै आन्दोलनरत उनीहरूले वीरगञ्ज बजार बन्द गर्ने चेतावनी दिएका छन् ।
सडक पीडित व्यवसायी तथा घरधनीहरूले ‘वीरगञ्ज युवा तथा व्यापारी सडक पीडित सङ्घर्ष समिति’ गठन गर्दै आउँदो बिहीबार बिहानदेखि दिउँसो १२ बजेसम्म बजार बन्द गर्ने निर्णय गरेका छन् । समितिका अध्यक्ष तथा वीरगञ्ज महानगरपालिका – ९ का वडाध्यक्ष जवाहर प्रसाद गुप्ताका अनुसार सडक विस्तारले ऐतिहासिक सहरको अस्तित्व नै मेटिने भएकाले यसको आवश्यकतामाथि पुनर्विचार गर्नुपर्ने माग गरिएको छ ।
सङ्घर्ष समितिले उचित मुआब्जा सुनिश्चित गर्नुपर्ने र सडक विस्तारको प्रक्रियामा पीडितहरूको सहमति अनिवार्य हुनुपर्ने माग राखेको छ । माग बेवास्ता भए चरणबद्ध आन्दोलन गर्ने चेतावनी समितिले दिएको छ ।
गत फागुन २८ गते सर्वोच्च अदालतले सडक विस्तारविरुद्ध दायर गरिएको रिट खारेज गरेपछि सरकारलाई विस्तार कार्य अघि बढाउने बाटो खुलेको थियो । सडक विभागले वीरगञ्ज महानगरपालिका र नापी कार्यालयसँग समन्वय गर्दै सिमाङ्कन प्रक्रिया अघि बढाइसकेको छ ।
वीरगञ्जको गण्डक चोकदेखि मितेरी पुलसम्मको सडक विस्तार तीन दशकदेखि अवरुद्ध थियो । विभिन्न समयमा अदालतमा दायर मुद्दाका कारण प्रक्रिया रोकिएको थियो । तर, अदालतको पछिल्लो निर्णयपछि सरकारले पुनः विस्तार कार्य अघि बढाएको हो ।
सरकारको निर्णयको विरोधमा उत्रिएका व्यवसायी र घरधनीहरूले न्यायोचित क्षतिपूर्ति दिनुका साथै अन्य वैकल्पिक समाधान खोज्न आग्रह गरेका छन् । आन्दोलन चर्किएमा उत्पन्न हुने परिस्थितिको जिम्मेवारी नेपाल सरकार र वीरगञ्ज महानगरपालिकाले लिनुपर्ने सङ्घर्ष समितिले चेतावनी दिएको छ ।
