वीरगंज | वीरगञ्ज महानगरपालिकाको अनुगमन निरीक्षण टोलीले सिर्सिया नदी प्रदूषण गर्ने उद्योगहरूमा अनुगमन गरेको छ। महानगरका वातावरण अधिकृत प्रकाश ऐरेको नेतृत्वमा गएको टोलीले बारा र पर्साका तीन वटा उद्योग अनुगमन गरेको हो।

टोलीले महालक्ष्मी सोल्भेन्ट एण्ड रिफाइनरी, अमृत तेल रिफाइनरी, र वीरगञ्ज महानगरपालिका वडा नम्बर २१ मा रहेको सुशील बनस्पति घ्यू उद्योगको निरीक्षण गरेको थियो। अनुगमनका क्रममा तीनै उद्योगहरूले फोहोर पानी प्रशोधन नगरी सिधै सिर्सिया नदीमा फाल्ने गरेको पाइएको वातावरण अधिकृत ऐरेले जानकारी दिए। वीरगञ्ज महानगरपालिका भित्रका दुर्गा पेपर र मोरियम लेदर उद्योगले भने प्रशोधन प्लान्ट जडान गरिसकेको र अन्य उद्योगहरू निरीक्षणको क्रममा प्रदूषण गरिरहेको नपाइएको बताइएको छ।

महानगरपालिकाले साप्ताहिक रूपमा अनुगमन गर्दै आएको र चैते छठलाई मध्यनजर गर्दै दैनिक रूपमा उद्योगहरूमा निगरानी गरिरहेको जनाएको छ। कानूनी रूपमा महानगरपालिकाको अधिकार क्षेत्र बाहिर केही गर्न नसक्दा यो समस्या बढिरहेको समेत अधिकृत ऐरेले जानकारी दिए। पछिल्लो समय ८५ प्रतिशत ढल बाराका उद्योगबाट मुख्य सडकको नाला हुँदै बाराको चोर्नी क्षेत्र हुँदै सिर्सिया खोलामा मिसिएर सिर्सिया नदीमा प्रदूषणको समस्या गम्भीर बन्दै गएको छ।