वीरगञ्ज । ठाकुर राम क्याम्पसमा सम्पन्न स्वबियु चुनावको रोकिएको मत गणना सुचारु हुनु पर्नेमा पर्साका अधिकांस राजनीतिक दलहरु एकमत भएका छन् । सोमबार जिल्ला प्रशासन कार्यालय पर्साले जिल्ला प्रशासन कार्यालयको सभाहलमा आयोजना गरेको सर्वदलीय बैठकमा ठाकुरराम क्याम्पसमा रोकिएको मतगणना सुचारू हुनुपर्नेमा पर्साका राजनीतिक दलहरू एक मत भएका हुन्।

बैठकले फर्जी शैक्षिक प्रमाणपत्रको आधारमा विद्यार्थी भर्ना गर्ने गिरोहलाई कार्वाही गरि मतपेटिकाको नम्बर परिवर्तनको बिषयमा सत्य तथ्य सार्बजनिक गरेर मतगणना शुचारु हुनुपर्नेमा सबै पार्टी प्रतिनिधिहरु एकमत भएको बैठकमा सहभागी राष्ट्रिय स्वतन्त्र पार्टी पर्सा सभापति हरि पन्तले बताए ।

बाक्सामा खसाली सकेको मतको ससम्मान गणना हुनुपर्छ भन्नेमा कसैको फरक मत रहेको पन्तले बताए । बैठकमा पर्साका प्रमुख जिल्ला अधिकारी गणेश अर्यालले दोषी देखिएका जो कोहीलाई निर्मम कार्बाही गर्न प्रशासन पछि नपर्ने बताए । उनले फर्जी प्रमाणपत्रको आधारमा विद्यार्थी भर्नाको जडसम्मै पुगेर निर्मम रूपमा कारवाही अगाडि बढाइने बताए ।

मतपेटिका सुरक्षाका बिषयमा पर्सा प्रहरी प्रमुख गौतम मिश्र र सशस्त्र प्रहरी १३ नम्बर गणका गणपति राधेश्याम धिमालले थप प्रष्ट पार्दै कुनैपनि किसिमको गम्भीर त्रुटी नरहेको स्पष्ट पारेका थिए । बैठकमा एमाले पर्सा अध्यक्ष डा. बिस्वम्भर शर्माले सबैले आ–आफ्नो भातृ सङठन हरुलाई यस बिषयमा आफूहरुले प्रष्ट पार्ने बताएका थिए ।

बैठकमा एमाले अध्यक्ष डा. शर्मा, नेपाली काङ्ग्रेसका तर्फबाट प्रवक्ता पाण्डे, सचिव नविन सिंह, राष्ट्रिय स्वतन्त्र पार्टीका जिल्ला सभापति हरि पन्त, जसपाका सिङ्गासन सा तेली, तबरेज अहमद, माओवादी केन्द्रका प्रभाकर गुप्ता, एकीकृत समाजवादीका मनोज चौधरी लगायत नेताहरूको उपस्थिति थियो ।