घोराही । दाङको घोराहीमा विद्यालय व्यवस्थापन समिति गठनका क्रममा विवाद हुँदा विद्यालयका प्रधानाध्यापकसहित तीन जनामाथि कुटपिट भएको छ । घोराही उपमहानगरपालिका–१४, नयाँबजारमा रहेको शुभप्रभात माध्यमिक विद्यालय व्यवस्थापन समिति गठनका विषयमा विवाद हुँदा विद्यालयका प्रधानाध्यापक रुद्र बुढासहित नेकपा बहुमतनिकट अखिल (क्रान्तिकारी) दाङ जिल्लाका अध्यक्ष नरेन्द्र विक र विद्यार्थी नेता पवन विकमाथि कुटपिट भएको हो ।

फागुन ४ गतेदेखि रिक्त रहेको विद्यालय व्यवस्थापन समिति गठनका लागि बुधबार तेस्रो पटक अभिभावक भेला बोलाइएको थियो । भेलामा गणपूरक सङ्ख्या नपुगेका कारण माइन्युट लेख्न नमान्दा आफूमाथि कुटपिट भएको विद्यालयका प्रधानाध्यापक बुढाले बताउनुभयो । विद्यालय व्यवस्थापन समिति गठनको भेलामा गणपूरक सङ्ख्या नपुगेका कारण माइन्युट उठाउन नमान्दा घोराही उपमहानगरपालिका–१४ का वडाध्यक्ष भानसिंह बुढालगायतका व्यक्तिबाट कुटपिट भएको प्रधानाध्यापक बुढाले बताउनुभयो ।

उहाँले ३७० भन्दा बढी अभिभावक रहेको विद्यालयमा तेस्रो पटक बोलाइएको भेलामा १२३ जना मात्रै अभिभावक उपस्थित भएका र ५१ प्रतिशत गणपूरक सङ्ख्या नपुग्ने भएकाले आफूले चौथो पटक भेला बोलाउन माग गर्दा कुटपिट भएको बताउनुभयो ।

“गणपूरक सङ्ख्या नपुगेको अवस्थामा व्यवस्थापन समिति गठन गर्न नसकिने मैले बताएपछि ममाथि कुटपिट भयो,” प्रधानाध्यापक बुढाले भन्नुभयो, “कुटपिटका कारण देखिने चोट नभए पनि शरीरका विभिन्न ठाउँमा दुखिरहेको छ ।” कुटपिटका कारण घाइते भएका प्रधानाध्यापकसहित तीन जना राप्ती स्वास्थ्य विज्ञान प्रतिष्ठानमा उपचारपछि डिस्चार्ज भएको प्रहरीले जनाएको छ ।

वडाध्यक्ष भानसिंह बुढाले आफूनिकट र विद्यालय प्रधानाध्यापक रुद्र बुढाले निवर्तमान विद्यालय व्यवस्थापन समितिका अध्यक्षलाई दोहो¥याउन खोज्दा विद्यालय व्यवस्थापन समिति गठन हुन सकेको थिएन । विद्यालय व्यवस्थापन समिति गठनका लागि पहिलो पटक बोलाइएको भेलामा १२८ र दोस्रो भेलामा ४८ जना अभिभावक उपस्थित भएका र गणपूरक सङ्ख्या १८६ नपुगेका कारण तेस्रो पटक भेला बोलाइएको थियो ।

वडाध्यक्ष बुढाले भने आफू विद्यालय व्यवस्थापन समिति गठनका लागि बोलाइएको भेलामा गएको तर कुटपिटमा संलग्न नरहेको बताउनुभयो । विद्यालय व्यवस्थापन समिति गठनका लागि बोलाइएको भेलाबाट व्यवस्थापन समिति गठन नहुने अवस्था भएपछि अभिभावकबिच विवाद भई झडप भएको तर त्यसमा आफ्नो कुनै पनि संलग्नता नरहेको बताउनुभयो । प्रधानाध्यापकमाथि कुटपिट गरेको भनेर गलत रूपमा प्रचार गर्ने काम भएको भन्दै वडाध्यक्ष बुढाले भन्नुभयो, “कुटपिटको घटनामा मेरो कुनै संलग्नता छैन । मेरो चरित्रहत्या गर्ने गरी गलत प्रचार भएको छ ।”

विद्यालय व्यवस्थापन समिति गठनको विषयलाई लिएर भएको विवादको विषयलाई मिलाउनका लागि दुवै पक्षसँग छलफलको प्रयास भइरहेको जिल्ला प्रहरी कार्यालय दाङका प्रवक्ता एवं प्रहरी नायब उपरीक्षक चक्रबहादुर शाहले बताउनुभयो । विवाद भएपछि दुवै पक्षलाई बोलाएर छलफलको प्रयास भइरहेको शाहले जानकारी दिनुभयो ।