काठमाडौँ — काठमाडौं महानगरपालिकाले जोखिमपूर्ण घरेलु श्रम गर्दै आइरहेकी १४ वर्षीया बालिकाको उद्धार गरेको छ । महानगरले कक्षा ९ मा पढ्दै गरिरहेको बालिकालाई उद्धार गरेको हो ।

महानगरमा जोखिमपूर्ण घरेलु श्रममा रहेको भन्ने गुनासो आएपछि गत फागुन २७ गते ती बालिकाको उद्धार गरिएको हो । गुनासो पाएपछि महानगरले बालबालिका खोजलतलास सेवा (१०४), बाल हेल्पलाईन (१०९८), प्रहरी वृत्त बानेश्वर, नगर प्रहरी बलसहितको बाल उद्धार कार्यदलका संयोजक रसला तण्डुकारको नेतृत्वमा बालिकालाई घरबाटै उद्धार गरिएको हो ।

उद्धारपछि ती बालिकालाई महानगरको अस्थायी संरक्षण गृहमा राखिएको छ । बालिकाको स्थायी घर हुम्ला हो । ती बालिका ३ वर्षदेखि उक्त घरमा बस्दै आएकी थिइन् । उद्धार गरिएकी बालिकामाथि चोरीको आरोप लगाएर कुटपिटसमेत हुने गरेको महानगरले जानकारी दिएको छ ।

महानगरपालिकाले ‘बालापनको रक्षा, भविष्यको सुरक्षा’ कार्यक्रमअन्तर्गत गएको २०८१ को वैशाखदेखि आफ्ना नातागोताबाहेकका व्यक्ति तथा परिवारसँग रहेबसेका बालबालिकाको विवरण संकलन गरेर निगरानी र उद्धार कार्य गरिरहेको छ ।