बारा | बारा जिल्लाको सिम्रौनगढ नगरपालिका-६ स्थित सतुवाई बोर्डर एरियामा प्रहरीले ठूलो मात्रामा प्रतिबन्धित लागू औषध बरामद गरेको छ। मिति २०८१ फागुन २८ गते साँझ करिब ५:५० बजे इलाका प्रहरी कार्यालय सिम्रौनगढबाट खटिएको प्रहरी गस्ती टोलीले लागू औषध सहितको झोला फेला पारेको हो।
भारतको घोडासहनबाट सिम्रौनगढ बजारतर्फ आउँदै गरेका एक व्यक्तिले प्रहरी टोलीलाई देखेपछि प्लाष्टिकको झोला फालेर भागेका थिए। प्रहरीले उक्त झोला खोली जाँच गर्दा पाँच वटा सानो काटुन भित्र ठूलो मात्रामा लागू औषध लुकाई छिपाई राखिएको फेला परेको थियो। प्रहरीले तत्काल नियन्त्रणमा लिएको ती लागू औषधहरू निम्नानुसार छन्:
Diazepam 2ml – ५०० पिस एम्पुल
Noophine 2ml – ५०० पिस एम्पुल
Phenargan 2ml – ५०० पिस एम्पुल
जम्मा ५ काटुनभित्र १५०० पिस प्रतिबन्धित औषधि बरामद गरिएको छ। घटनासँग सम्बन्धित थप अनुसन्धान भइरहेको प्रहरीले जनाएको छ। यसरी सीमावर्ती क्षेत्रबाट लागुऔषधको तस्करी भइरहेको भन्दै प्रहरीले निगरानी अझ कडा पार्ने जनाएको छ।
