काठमाडौं । विदेशमा रहेका व्यक्तिको नाममा फेसबुकको फेक आईडी खोलेर ठगी गर्ने एक जना पक्राउ परेका छन् । पक्राउ पर्नेमा काठमाडौं तारकेश्वर नगरपालिका-५ लोलाङ हाईट बस्ने २७ वर्षीय नारायणदत्त खकुराल छन् । उनलाई बुधबार प्रहरीले नियन्त्रणमा लिएको हो ।

काठमाडौं उपत्यका अपराध अनुसन्धान कार्यालय, टेकुका सूचना अधिकारी प्रहरी उपरीक्षक (एसपी) काजी कुमार आचार्यका अनुसार पक्राउ परेका खकुरालले फेसबुकमार्फत वैदेशिक रोजगारीमा रहेका व्यक्तिहरू पहिचान गर्थे । त्यसपछि उनीहरूका फेसबुक प्रोफाइल अध्ययन गरी परिवार, आफन्त, साथीभाइ पत्ता लगाउँथे ।

त्यसपछि सोही व्यक्तिको नाममा फेक फेसबुक आईडी बनाएर तस्बिर राख्थे । उनले ती व्यक्तिका आफन्तलाई फेसबुकमा साथी बनाएर मेसेन्जरमा कुराकानी सुरु गर्थे । त्यसपछि आफू बिरामी परेर अस्पताल भर्ना भएको वा साथी बिरामी भएर उपचार भइरहेको भन्दै पैसा माग्थे । उनले पैसा पठाउन विभिन्न पसलका क्यूआर कोडसमेत पठाउने गरेको प्रहरी अनुसन्धानबाट खुलेको छ ।

एसपी आचार्यका अनुसार खकुरालले ठगीका लागि काठमाडौंका विभिन्न पसलका क्यूआर कोडहरू प्रयोग गरेका थिए । उनी पसलमा गई आफन्त बिरामी भएर अस्पतालमा भर्ना भएको भन्दै पैसा पठाउन लागेको बताउँथे ।

त्यसपछि पसलेलाई “मेरो कुनै बैंक खाता छैन, हजुरको खातामा पैसा पठाइदिन्छु, त्यो रकम राखेर मलाई नगद दिनुहोस्” भन्ने गर्थे । पसलको क्यूआर कोड प्रयोग गरी रकम संकलन गरेको जानकारी पाएपछि प्रहरीले उनलाई पक्राउ गरेको हो ।

खकुराललाई थप अनुसन्धान तथा कानुनी कारबाहीका लागि जिल्ला प्रहरी परिसर, भद्रकाली, काठमाडौं पठाइएको छ ।