वीरगञ्ज । वीरगञ्जस्थित रामकुमार महावीर प्रसाद केडिया आँखा अस्पतालले आफ्नो ५० औँ स्थापना वर्ष (स्वर्ण महोत्सव) को अवसरमा ‘दृष्टि यात्रा’ कार्यक्रम सम्पन्न गरेको छ ।

विक्रम संवत् २०३१ मा स्थापना भएको अस्पतालले २०८१ सालमा आफ्नो ५० औँ वर्ष पूरा गरेको छ ।

पछिल्लो पाँच दशकदेखि आँखासम्बन्धी उपचार सेवा प्रदान गर्दै आएको अस्पतालले निकालेको दृष्टि यात्राले वीरगञ्जको मुख्य स्थानहरूको परिक्रमा गरेको थियो ।

परिक्रमा पश्चात् आयोजित कोणसभामा बोल्दै अस्पतालका अध्यक्ष राजेश कुमार केडिया र मेडिकल डाइरेक्टर डा. नितिन तुलस्यानले आधुनिक प्रविधिसहितको सेवा विस्तार गर्दै जाने प्रतिबद्धता व्यक्त गरे ।

“हामीले ५० वर्षदेखि निरन्तर रूपमा आँखासम्बन्धी उपचार सेवा प्रदान गर्दै आएका छौँ । स्वर्ण महोत्सवकै अवसरमा उद्घाटन गरिने नवनिर्मित भवनले अझ स्तरीय र प्रभावकारी सेवा दिन मद्दत गर्नेछ,” अध्यक्ष केडियाले भने ।

स्वर्ण महोत्सव समारोहअन्तर्गत नवनिर्मित भवनको शिलान्यास नेपालका उपराष्ट्रपति रामसहाय प्रसाद यादवको प्रमुख आतिथ्यमा गरिने पनि केडियाले जानकारी दिए ।

केडिया आँखा अस्पतालले आगामी दिनमा पनि उपचार सेवा विस्तार गर्दै थप आधुनिक र उन्नत प्रविधिसहित सेवा दिने लक्ष्य राखेको जनाएको छ ।