वीरगञ्ज | सुरक्षागुल्म वीरगञ्जबाट खटिएको टोलीले स्रोत नखुलेको ठूलो परिमाणको नगदसहित एक भारतीय नागरिकलाई पक्राउ गरी वीरगञ्ज भन्सार कार्यालयमा बुझाएको छ।
जिल्ला पर्सा, वीरगञ्ज महानगरपालिका–१६ भन्सार मेनगेट अगाडि चेकजाँच गर्ने क्रममा BR 05 AB 6694 नम्बरको सुपर स्प्लेन्डर मोटरसाइकलमा भारतबाट नेपाल प्रवेश गर्दै गरेका भारतीय नागरिक कन्हैया कुमार गुप्तालाई नियन्त्रणमा लिइएको हो। उनी भारत, पूर्वी चम्पारण, रक्सौलका ३४ वर्षीय बासिन्दा भएको खुलेको छ।

प्रहरीका अनुसार गुप्ताले आफ्नो शरीरका विभिन्न भागमा लुकाइछिपाइ राखेको स्रोत नखुलेको नेपाली रुपैयाँ फेला परेको थियो।

यसरी बरामद रकम र सवारीसाधनको कूल मूल्य रु. ५ लाख पुगेको छ। नियन्त्रणमा लिइएका गुप्तालाई आवश्यक अनुसन्धान तथा कारबाहीका लागि वीरगञ्ज भन्सार कार्यालयमा बुझाइएको सुरक्षा स्रोतले जनाएको छ।