वीरगञ्ज । राष्ट्रिय नागरिक संघर्ष समितिले नेपाल अधिराज्यको संविधान २०४७ पुनःस्थापनाका लागि जनआन्दोलन गर्ने घोषणा गरेको छ। समितिका संयोजक नरेश बहादुर सिंहले एक प्रेस विज्ञप्ति जारी गर्दै ७५औँ प्रजातन्त्र दिवसको अवसरमा पूर्वराजा ज्ञानेन्द्र शाहले देशवासीका नाममा दिनुभएको शुभकामना सन्देशलाई स्वागत गर्दै एकताबद्ध भएर आन्दोलनमा जुट्न अपिल गरेका छन्।

समितिले पूर्वराजाद्वारा गरिएको आह्वानलाई मन, वचन र कर्मले कार्यान्वयन गर्ने प्रतिबद्धता जनाउँदै राजनीतिक दल, धार्मिक संघ–संस्था, पत्रकार, सुरक्षा निकाय, न्यायपालिका, राष्ट्रसेवक कर्मचारी, कानुन व्यवसायी, उद्योगपति, मजदुर, किसान लगायत सबैलाई आन्दोलनमा सहभागी हुन अनुरोध गरेको छ।

विज्ञप्तिमा २०७२ को संविधानलाई खारेज गर्दै राष्ट्रिय मेलमिलापको आधारमा आधुनिक र परम्परागत शक्तिहरूलाई एकीकृत गरी राष्ट्रिय शक्ति निर्माण गर्ने, राजा, जनता र राजनीतिक दलहरूलाई सही मार्गदर्शन गर्ने तथा २०४७ सालको संविधान पुनःस्थापनाका लागि अहिंसात्मक जनआन्दोलन सञ्चालन गर्ने उल्लेख छ।

यसका लागि नेपालको राष्ट्रिय झण्डामुनि गोलबद्ध भई, निस्कलंक, सक्षम र वरिष्ठ राजनीतिज्ञको संयोजकत्वमा राष्ट्रिय अहिंसक जनआन्दोलन परिचालन समिति गठन गर्न समेत समितिले सबै सरोकारवालालाई आह्वान गरेको छ।