वीरगञ्ज। राष्ट्रिय प्रजातन्त्र पार्टी (राप्रपा) ले सातै प्रदेशमा सरकार र व्यवस्थाविरुद्ध भण्डाफोर सभा आयोजना गर्ने घोषणा गरेको छ। पूर्वराजा ज्ञानेन्द्र शाहले प्रजातन्त्र दिवसको अवसरमा दिएको अभिव्यक्तिसँगै राप्रपा आन्दोलनको तयारीमा जुटेको हो।

पार्टीका महामन्त्री राजेन्द्र गुरुङका अनुसार फागुन महिनामा विभिन्न प्रदेशहरूमा भण्डाफोर सभा गर्नका लागि मिति तय भइसकेको छ। पोखरामा फागुन ९ गते, बुटवलमा १७ गते, धनगढीमा १८ गते, जनकपुरमा २१ गते, काठमाडौंमा २५ गते र सुर्खेतमा २७ गते सभा हुनेछन्। कोशी प्रदेशको सभा मिति भने अझै टुंगो लाग्न बाँकी छ।

राप्रपाका महामन्त्री र आन्दोलन परिचालन समितिका अध्यक्ष धवल शमशेर जबरा लगायतका केन्द्रीय नेताहरू मधेश प्रदेशमा पुगेर बैठक गर्ने तयारीमा छन्। उक्त बैठकमा आन्दोलनको स्वरूप र पार्टीलाई सशक्त बनाउनका लागि छलफल हुने बताइएको छ।

यसै बीच, वीरगञ्जका पूर्व मेयर तथा पूर्व सांसद बिमल श्रीवास्तवका भाई नन्दु श्रीवास्तवसहित वीरगञ्जका विभिन्न राजावादी व्यक्तिहरू राप्रपामा प्रवेश गर्ने तयारीमा छन्।

राप्रपा सरकारविरुद्ध आन्दोलनलाई चर्काउने तयारीमा छ भने यस सम्बन्धी अन्य दलहरूको प्रतिक्रिया भने आइनसकेको छ।