वीरगंज | आईसीसी च्याम्पियन्स ट्रफी अन्तर्गत बिहीबार भएको खेलमा भारतले बंगलादेशलाई ६ विकेटले पराजित गरेको छ।
टस जितेर पहिले ब्याटिङको निर्णय गरेको बंगलादेशले ४९ ओभर ४ बलमा आफ्नो सबै विकेट गुमाउँदै २२८ रन बनाएको थियो। २२९ रनको लक्ष्य सहित मैदानमा उत्रिएको भारतीय टोलीले २१ बल बाँकी छँदै ४६ ओभर ३ बलमा ४ विकेटको क्षतिमा लक्ष्य भेटायो।
भारतका लागि शुभमन गिलले १०१ रनको शतकीय पारी खेले। कप्तान रोहित शर्मा र विकेटकिपर केएल राहुलले समान ४१, विराट कोहलीले २२, श्रेयस ऐयरले १५ रन बनाए।
बंगलादेशका लागि बलिङतर्फ रिसद होसेनले २ तथा मुस्तफिजुर रहमान र टस्किन अहमदले समान १–१ विकेट लिए।
यता ब्याटिङतर्फ बंगलादेशका तोहिद हृदोयले १०० रनको शतकीय पारी खेले। जकर अलीले ६८ रन बनाउँदा तन्जिद हसनले २५ र रिसद होसेनले १८ रन बनाए। अन्य कसैले दोहोरो अंकमा रन बनाउन सकेनन् भने चार खेलाडी डक आउट भए।
बलिङतर्फ भारतका मोहम्मद शामीले ५ विकेट लिँदा हर्सित रानाले ३ विकेट लिए। अक्षर पटेलले २ विकेट लिए।
जितसँगै भारत समूह ‘ए’ को दोस्रो स्थानमा पुगेको छ। शीर्ष स्थानमा न्युजिल्यान्ड छ। बंगलादेश तेस्रो स्थानमा हुँदा आयोजक राष्ट्र पाकिस्तान चौथो स्थानमा छ।
प्रतियोगिता अन्तरगत आज अष्ट्रेलिया र दक्षिण अफ्रिकाबीच खेल हुनेछ।
