बारा ।सिकेन्द्र साह । बाराको सुवर्ण गाउँपालिका कवही टोलका जयप्रकाश यादवले ट्राफिक प्रहरीबाट अन्याय भएको गुनासो गरेका छन्। उनले आफ्नो स्वास्थ्य उपचारका लागि कलैया जाँदै गर्दा ट्राफिक प्रहरीले गाडी चेकजाँचको क्रममा अनावश्यक दुर्व्यवहार गरेको बताएका छन्।

उनका अनुसार, २०३-०१२प ६७०२ नम्बरको मोटरसाइकलमा सवार यादवलाई हनुमान मन्दिर नजिक ट्राफिक प्रहरीले रोकेर सवारी चालक अनुमति पत्र माग्यो। यादवसँग लाइसेन्स भए पनि स्वास्थ्य समस्याका कारण उनले घरमै रहेको बुलबुक भोलिपल्ट ल्याउने अनुरोध गरेका थिए। प्रहरी जवान सागर यादवले त्यो अनुरोध स्वीकृत गरे पनि भोलिपल्ट बुलबुक लिएर जाँदा एक हजार रुपैयाँको चिट काटिदिएको पीडितको आरोप छ।

यादवले ट्राफिक प्रहरी कार्यालयमा उपस्थित भई सबै प्रमाण देखाउँदा पनि झुक्याएर चिट काटिएको बताए। उनले स्वास्थ्य उपचारका लागि गाउँबाट ऋण लिएर आएकाे अवस्थामा प्रहरीले अनावश्यक आर्थिक भार थपेको भन्दै असन्तोष व्यक्त गरे।

“नियम कानुनको धज्जी उडाउँदै ट्राफिक प्रहरीले नागरिकलाई दुःख दिने काम गरेको छ। यसप्रति सरकार र सम्बन्धित निकायले गम्भीर ध्यान दिन आवश्यक छ।” – पीडित जयप्रकाश यादव

नागरिकहरूलाई सुरक्षाको अनुभव गराउने उद्देश्यले चलाइएको “ट्राफिक प्रहरी हाम्रो साथी” अभियान अन्तर्गत नै प्रहरीबाट यस्तो व्यवहार भएको गुनासो आउनु गम्भीर विषय हो। यस विषयमा सम्बन्धित निकायले अनुसन्धान गरी दोषीमाथि कारबाही गर्नुपर्ने स्थानीयको माग छ।