वीरगञ्ज । भारतको ओडिशा राज्यस्थित भुवनेश्वरको कलिंगा इन्स्टिच्युट अफ इन्डस्ट्रियल टेक्नोलोजी (किट) मा नेपाली विद्यार्थी प्रकृति लम्साल शङ्कास्पद अवस्थामा मृत भेटिएपछि विश्वविद्यालय प्रशासनले प्रभावित विद्यार्थीहरूको यात्रासम्बन्धी खर्च बेहोर्ने निर्णय गरेको छ ।

नयाँ दिल्लीस्थित नेपाली दूतावासले जारी गरेको विज्ञप्तिअनुसार परराष्ट्र मन्त्री आरजु राणाले शैक्षिक संस्थाका पदाधिकारीहरूसँग गरेको छलफलपछि उक्त निर्णय भएको हो । छात्रावास छोडेर नेपाल गएका विद्यार्थीहरूको नेपाल फर्कने टिकट खर्च विश्वविद्यालयले नै व्यहोर्ने तथा परीक्षामा छुट भएका विद्यार्थीहरूका लागि पुनः परीक्षा सञ्चालन गरिने प्रतिबद्धता विश्वविद्यालयले जनाएको छ ।

घटनाको अनुसन्धान तथा आवश्यक जानकारी सङ्कलन गर्न नेपाली दूतावासका प्रतिनिधिहरू ओडिशा पुगेर नेपाली विद्यार्थीहरू र विश्वविद्यालयका पदाधिकारीहरूसँग छलफल गरिरहेका छन् । छलफलका क्रममा परराष्ट्र मन्त्री आरजु राणाले विश्वविद्यालयका उच्च पदाधिकारीहरूसँग टेलिफोन वार्ता समेत गरेकी छन् ।

ओडिशा सरकारले यस घटनाको छानबिनका लागि गृह विभागका अतिरिक्त मुख्य सचिव, महिला तथा बाल विकास विभागका प्रमुख सचिव तथा उच्च शिक्षा विभागका सह–सचिवसहितको उच्चस्तरीय जाँचबुझ समिति गठन गरेको छ । भारतीय सरकारले गठन गरेको समितिले तयार पार्ने प्रतिवेदनका आधारमा कानुनी तथा प्रशासनिक कारबाही गरिने बताइएको छ ।

गत फेब्रुअरी १६ को साँझ बीटेक तेस्रो वर्षकी विद्यार्थी प्रकृति लम्सालको शव विश्वविद्यालयको होस्टेलमा शङ्कास्पद अवस्थामा फेला परेको थियो । प्रारम्भिक अनुसन्धानमा आत्महत्या भएको भनिए पनि नेपाली विद्यार्थीहरूले घटनामा अन्य कारणहरू रहेको भन्दै विश्वविद्यालय प्रशासनविरुद्ध विरोध प्रदर्शन गरेका थिए ।

विद्यार्थीहरूले घटनाको निष्पक्ष छानबिन र दोषीहरूमाथि कडा कारबाहीको माग गरेका छन् । उनीहरूले प्रकृतिलाई लगातार एक भारतीय विद्यार्थीले दुर्व्यवहार गरिरहेको आरोप लगाउँदै विश्वविद्यालय प्रशासनले समयमै आवश्यक कारबाही नगरेको गुनासो गरेका छन् । मृतक विद्यार्थीका परिवारले समेत छानबिनमा निष्पक्षता अपनाउन माग गरेका छन् ।

प्रहरीले प्रकृतिका भाइ नाता पर्ने सोही विश्वविद्यालयमा अध्ययनरत एक विद्यार्थीको उजुरीका आधारमा आत्महत्या गर्न बाध्य पारेको अभियोगमा एक भारतीय विद्यार्थीविरुद्ध मुद्दा दर्ता गरेको छ । साथै, विश्वविद्यालय प्रशासनले घटनाका दोषीलाई कारबाही गर्न नसकेको भन्दै विभिन्न विद्यार्थी सङ्गठनहरूले थप विरोध प्रदर्शन गर्ने चेतावनी दिएका छन् ।