काठमाडौं । टिकटकको माउ कम्पनी बाइटडान्सले ओपनएआईको सोरालाई टक्कर दिन नयाँ आर्टिफिसियल इन्टेलिजेन्स (एआई) टुल सार्वजनिक गरेको छ । कम्पनीले शब्दकै भरमा गुणस्तरीय भिडिओ तथा तस्बिर बनाइदिने ‘गोकु एआई’ टुल ल्याएको हो । यसको आगमनसँगै एआई क्षेत्रमा नयाँ बहस सुरु भएको छ ।
गोकु एआईले रेक्टिफाइड फ्लो ट्रान्सफर्मर्स (Rectified Flow Transformers) प्रयोग गरेको छ । यसले प्रयोगकर्ताको ‘प्रम्प्ट’लाई विश्लेषण गरी गुणस्तरीय तस्बिर वा भिडिओ बनाउने बताइएको छ । यो टुलले ओपनएआईको सोरालाई चुनौती दिने अनुमान छ ।
यो एआई मोडेल ओपन-सोर्स भएकाले जो कोहीले प्रयोग गर्न सक्नेछन् । मेटाको लामा (Llama) र डिपसिक जस्तै यो मोडेल पनि सजिलै उपलब्ध हुनेछ । यद्यपि, यसले एआईलाई नियमन गर्ने प्रयासमा चुनौती थप्न सक्ने विज्ञहरूले बताएका छन् ।
गोकु एआईको विकासले एआई क्षेत्रमा चिनियाँ कम्पनीहरूको बढ्दो प्रभावलाई देखाएको छ । चीनले एआईमा ठूलो लगानी गरिरहेको छ र यसका मोडेलहरू थप परिष्कृत हुँदै गएका छन् । जसले पश्चिमी कम्पनीहरूलाई चुनौती दिइरहेको छ ।
गोकु एआईले उच्च गुणस्तरको सामग्री उत्पादन गर्ने क्षमताले उत्पादन लागत घटाउने अनुमान गरिएको छ ।
यद्यपि, गोकु एआईले डिपफेक प्रविधिको जोखिम पनि बढाएको छ । यसले गलत सूचना, पहिचान चोरी र फोटो म्यानुपुलेसन जस्ता खतरा निम्त्याउन सक्ने विश्लेषण गरिएको छ । त्यसैले यसको खतरालाई कम गर्न सचेतना कार्यक्रमहरू सञ्चालन गर्नुपर्नेमा उनीहरूले जोड दिएका छन् ।
