वीरगंज | मधेश प्रदेश सरकारका मुख्यमन्त्री सतीशकुमार सिंहसहितको टोलीले गरेको अनुमगनबाट जनकपुरधामका १८ वटा अस्पताल बन्द भएका छन् । मुख्यमन्त्री सिंह तथा स्वास्थ्य तथा जनसंख्या मन्त्रालयको टोलीसहितले गत सातादेखि थालेको नीजि अस्पताल अनुगमनबाट दर्ता प्रक्रियाबिना सञ्चालनमा आएका १८ वटा अस्पताल बन्द भएका हुन् ।

अनुगमन टोलीले ४० नीजि अस्पताल अनुगमन गरिसकेको छ । यहाँका बिनादर्ता सञ्चालित मुस्कान अस्पताल, अरमान हस्पिटल, सहयोग हस्पिटल, जनकपुर मोर्डन हस्पिटल, माँ गायत्री मेमोरियल हस्पिटल, रामा मेमोरियल हस्पिटल, जनकपुर सिता हस्पिटल, बिएन हस्पिटल, ज्योति आँखा अस्पताल, जनकपुर गोल्डेन हस्पिटल, जनकपुर मधेश हस्पिटल, लाइफ केयर एण्ड रिसर्च सेन्टर, न्युरो सेन्टर, कृष्णा अस्पताल, जनकपुर गोदावरी हस्पिटल, जनक मेमोरियल हस्पिटल, गीताश्री इएनटी स्पेसियालिटी क्लिनिक प्रालि र जनकपुर मोडल अस्पताल बन्द भएका छन् ।

यस्तै, अनुगमनबाट नवीकररण नभएका अस्पतालमा समर हस्पिटल, श्रीराम हस्पिटल, जनकपुर ग्राण्डी अस्पताल, साई मल्टिस्पेसियालिटी हस्पिटल एण्ड ट्रमा सेन्टर, ओम दीर्घायु अस्पताल, मिहीलाल एन्टरनेशनल, जनकपुर सुरक्षा अस्पताल, विनयतारा फाउण्डेशन, धनुषा अस्पताल, जनकपुर सिटी, नवजीवन अस्पताल, बैदेही अस्पताल, एडभान्स सिटी एण्ड डाइगनोष्टिक सेन्टर रहेका छन् ।

अनुगमनका क्रममा कागजी प्रक्रिया पूरा गरी सञ्चालनमा रहेका जनकपुरधामका अस्पतालमा नैना अस्पताल, म्याक्स लाइफ, स्वस्तिक अस्पताल, हिरा हस्पिटल एण्ड रिसर्च सेन्टर, न्यूरो हस्पिटल एण्ड रिसर्च सेन्टर, कृष्ण मेडिकल एण्ड टेक्निकल रिसर्च सेन्टर, जीवन ज्योति, केयर मेडिकल सेन्टर र अपोलो अस्पताल भेटिएको जनाएको छ ।

मुख्यमन्त्री सिंह तथा प्रदेशको स्वास्थ्य तथा जनसंख्यामन्त्री शत्रुधनप्रसाद सिंहसहितको टोलीले अनुगमनको क्रममा बन्द गराएका १८ अस्पताललाई दर्ता प्रक्रिया पूरा गरेर मात्र सञ्चालन गर्न पाउने चेतावनी दिएको छ । नवीकरण नभएका १३ अस्पताललाई नवीकरणका लागि दुई महिनाको समयावधि दिएको छ ।

अनुगमन गरिएकोमध्ये नौवटा अस्पताल विधिवत रुपमा सञ्चालन रहेको पाइएको अनुगमन समितिका सदस्य एवं मन्त्रालयका जनस्वास्थ्य अधिकृत सन्तोषकुमार ठाकुरले जानकारी दिनुभयो ।

उहाँले कुनै पनि निकायबाट अस्पताल सेवा सञ्चालन स्वीकृति नलिइ सञ्चालन भएका १८ अस्पताल बन्द गरिएको बताउनुभयो । उहाँले भन्नुभयो, “बन्द भएका अस्पतालले दर्ता गरेर पुनः सञ्चालन गर्न सकिन्छ ।”

मुख्यमन्त्री एम्बुलेन्स चालक

अस्पतालमा स्वास्थ्य सेवामा भइरहेको अनियमित्ताको जरोसम्म पुग्न मुख्यमन्त्री सिंहले आइतबार राति नाटकीय शैली अपनाउँदै एम्बुलेन्स चालक भएर फोन वार्तालाभ गर्नुभएको छ । उहाँले आफैंलाई एम्बुलेन्स चालकको रूपमा परिचय गराउँदै मोडल अस्पतालका गार्डलाई फोन गर्दा स्वास्थ्य क्षेत्रमा भइरहेको दलालीको पर्दाफास गर्नुभएको हो ।

मुख्यमन्त्री सिंहले आफूलाई ३११२ नम्बरको एम्बुलेन्सचालक सरोज भनेर चिनाउँदै बिरामी लिएर अस्पतालमा भर्ना गराउन खोजेको फोनवार्ताका क्रममा अस्पताल पक्षले अनावश्यक शुल्क असुल्ने, दलालमार्फत बिरामी भित्र्याउनेजस्ता गतिविधि खुलेका छन् ।

मुख्यमन्त्री सिंहले भन्नुभयो, “दलाली गरेर बिरामीलाई आर्थिक शोषण गर्ने कार्य सह्य हुँदैन । प्रदेश सरकारले यस्ता अनियमित गतिविधि नियन्त्रण गर्न कडाइका साथ लागेको छ ।”