वीरगंज | क्यानडाको टोरन्टोमा अवतरण गर्ने क्रममा एक अमेरिकी विमान दुर्घटनाग्रस्त भएको छ। डेल्टा एअरलाइन्सको उक्त विमान, जुन मिनिसोटाबाट उडेको थियो, टोरन्टो पिअरसन अन्तर्राष्ट्रिय विमानस्थलको धावनमार्गमा पल्टिएर उल्टो परेको हो। विमानमा सवार ८० यात्रुमध्ये केही घाइते भएका छन्, तर सबै यात्रुहरूको उद्धार गरिएको अमेरिकी सङ्घीय उड्डयन प्रशासनले जनाएको छ।

घटना स्थानीय समय अनुसार सोमवार दिउसो २:१५ बजे भएको थियो। दुर्घटनामा केही यात्रु घाइते भएका भए पनि अधिकांशको स्थिति सामान्य रहेको बताइएको छ। १८ जनालाई अस्पताल पुर्याइएको छ, जसमा एक बालकसहित तीन जनालाई गम्भीर चोट लागेको छ।

घटनाका फुटेजहरूमा अग्नि नियन्त्रकहरूले यात्रुहरूलाई विमानबाट बाहिर निकालिरहेको देख्न सकिन्छ। त्यहाँ कठ्याङ्ग्रिँदो जाडो र तीव्र हावा चलिरहेको अवस्थामा दुर्घटना भएको हो। यस अघि, टोरन्टोमा दुई हिम आँधी आइसकेका थिए, जसले मौसमलाई थप कठिन बनाएको थियो।

क्यानडाको यातायात मन्त्री अनिता आनन्दले घटनाको निगरानी गरिरहेको बताएकी छन्, र विमानस्थलको प्रमुख कार्यकारी डेबोरा फ्लिन्टले आपत्कालीन सेवाका कर्मचारिहरूको छिटो प्रतिकार्यलाई सराहना गरेकी छन्। क्यानडाको यातायात सुरक्षा बोर्डले घटना सम्बन्धी छानबिन सुरु गरेको छ, र दुई धावनमार्ग केही दिनका लागि बन्द रहने जनाएको छ।

यो घटना उत्तर अमेरिकामा गएको महिनामा भएको चौथो ठूलो हवाई दुर्घटना हो।