वीरगञ्ज । ओडिशाको कलिगां इन्स्टिच्युट अफ इन्डस्ट्रीयल टेक्नोलोजी (किट) मा अध्ययनरत नेपाली विद्यार्थीहरूमाथि भएको धरपकडको घटनाले चर्को विरोधको रूप लिएको छ ।

भारतीय सत्तारूढ दल भारतीय जनता पार्टी समर्थित विद्यार्थी सङ्गठन अखिल भारतीय विद्यार्थी परिषद् (एबीभीपी) ले नेपाली विद्यार्थीहरूको पक्षमा आन्दोलन सुरु गरेको छ ।

नेपाली विद्यार्थीहरूलाई रातारात कलेजबाट निकालेर रेलवे स्टेसनमा अलपत्र छोडिएको घटनाप्रति एबीभीपीले कडा आपत्ति जनाएको छ । परिषद्ले किट कलेज परिसरमै विरोध प्रदर्शन गर्दै विश्वविद्यालय प्रशासनले आफ्ना निर्णयहरू सच्याउनुपर्ने माग राखेको छ ।

एबीभीपीका राष्ट्रिय कार्यकारिणी सदस्य विश्वजित पात्रले कलेज प्रशासनले नेपाली विद्यार्थीहरूसँग सार्वजनिक रूपमा माफी माग्नुपर्ने, निष्कासित विद्यार्थीहरूलाई पुनः कलेजमा भर्ना गरिनुपर्ने र रेलवे स्टेसनमा अलपत्र परेकाहरूलाई खान र बस्नको व्यवस्था मिलाइनुपर्ने माग गरेका छन् । त्यस्तै, मृतक विद्यार्थीको परिवारलाई उचित क्षतिपूर्ति दिन परिषद्ले आग्रह गरेको छ ।

परिषद्का ओडिशा सचिव बुद्धदेव वाग स्वयं रेलवे स्टेसन पुगेर नेपाली विद्यार्थीहरूको अवस्था बुझ्न पुगेका थिए । उनले कलेज प्रशासनसँग संवाद गरेर नेपाली विद्यार्थीहरूलाई पुनः होस्टेलमा फर्काउन पहल भइरहेको जानकारी दिए ।

आइतबार, किट विश्वविद्यालयको होस्टेलमा नेपाली छात्रा प्रकृति लम्साल मृत भेटिएकी थिइन् । घटनापछि विश्वविद्यालयमा अध्ययनरत ५०० भन्दा बढी नेपाली विद्यार्थीहरूले न्यायको माग गर्दै प्रदर्शन गरेका थिए । तर, प्रशासनले उनीहरूको आवाज सुन्नुको साटो उल्टै धरपकड गरेको र होस्टेल खाली गर्न निर्देशन दिएको थियो ।

घटनाले ठूलो चर्चा पाएपछि नेपाली दूतावासले हस्तक्षेप गरेको थियो । दूतावासको पहलपछि कलेज प्रशासनले नेपाली विद्यार्थीहरूलाई पुनः होस्टेलमा बस्न अनुमति दिएको छ । विश्वविद्यालयले जारी गरेको विज्ञप्तिमा नेपाली विद्यार्थीहरूलाई होस्टेल फर्किन आग्रह गर्दै वैकल्पिक कक्षाहरूको व्यवस्था मिलाउने प्रतिबद्धता जनाएको छ ।

घटनाले नेपाली विद्यार्थीहरूका सुरक्षासम्बन्धी प्रश्न उठाएको छ, जसका कारण ओडिशामा मात्र नभई अन्तर्राष्ट्रिय स्तरमै चासो बढेको देखिन्छ ।