वीरगंज । राष्ट्रिय प्राकृतिक स्रोत तथा वित्त आयोगले सार्वजनिक गरेको कार्यसम्पादन मूल्याङ्कन प्रतिवेदनमा चितवनको भरतपुर नगरपालिका उत्कृष्ट स्थानमा रहेको छ भने पर्सास्थित वीरगञ्ज महानगरपालिका सबैभन्दा कमजोर प्रदर्शन गर्ने महानगरका रूपमा उभिएको छ।

सार्वजनिक प्रतिवेदनअनुसार, भरतपुर नगरपालिकाले लगातार तेस्रो पटक पहिलो स्थान कायम राख्दै ७६.२ प्रतिशत अङ्क प्राप्त गरेको छ भने वीरगञ्ज महनगरले ४३.१ प्रतिशत अङ्क मात्र प्राप्त गरेको छ, जसले अन्य महानगरहरूको तुलनामा निकै कमजोर प्रदर्शन देखाएको छ।

आयोगले १७ वटा सूचकहरूमा आधारित मूल्याङ्कन गरेको थियो जसमा पालिकाको खर्च व्यवस्थापन, बेरुजु घटाउने प्रयास, लेखा परीक्षणको स्थिति, स्थानीय सञ्चित कोष व्यवस्थापन, र राजस्वको वितरण जस्ता महत्वपूर्ण विषयहरू समेटिएका थिए। वीरगञ्जको कार्यसम्पादनमा गम्भीर समस्याहरू देखिएका छन्, जस्तै बजेट पारित गर्न ढिलाइ गर्नु, खर्च पारदर्शिता नहुँदा समग्र राजस्व व्यवस्थापन कमजोर हुनु, र घरजग्गा र मनोरञ्जन करबाट प्राप्त रकमको ४० प्रतिशत प्रदेश सरकारलाई समयमै हस्तान्तरण नगर्नु।

भने, भरतपुर महानगरपालिकाले उत्कृष्ट कार्यसम्पादनका कारण आगामी आर्थिक वर्षमा सङ्घीय सरकारबाट कार्यसम्पादनमा आधारित वित्तीय समानीकरण अनुदान बढ्न सक्ने सम्भावना रहेको छ। वीरगञ्ज महानगरपालिकाले भने आफ्नो कमजोरी सुधार नगरे आगामी वर्षहरूमा सङ्घीय अनुदान प्राप्त गर्न कठिनाइ हुन सक्ने सङ्केत गरिएको छ।

स्थानीयवासी समेत वीरगञ्जको कार्यसम्पादनप्रति असन्तुष्ट रहेको पाइन्छ, र आगामी वर्षहरूमा यसमा सुधार ल्याउन महत्त्वपूर्ण कदम चाल्नुपर्ने आवश्यकता देखिन्छ।