वीरगञ्ज । राष्ट्रिय प्राकृतिक स्रोत तथा वित्त आयोगद्वारा प्रकाशित स्थानीय तहको कार्यसम्पादन मूल्याङ्कन प्रतिवेदन अनुसार पर्सा जिल्लाको पकाहामैनपुर गाउँपालिकाले सबैभन्दा कमजोर प्रदर्शन गरेको छ । आयोगको मूल्याङ्कनमा पकाहामैनपुर जम्मा ३२ अङ्क प्राप्त गर्दै जिल्ला कै सबैभन्दा कमजोर स्थानीय तहका रूपमा देखिएको छ ।

नेकपा (एमाले) को नेतृत्वमा रहेको पर्सा जिल्लाकै ठोरी गाउँपालिकाले ७१.२ अङ्क प्राप्त गर्दै मधेस प्रदेशमै पहिलो स्थान हासिल गरिरहँदा नेपाली काँग्रेसको बहुमत नेतृत्व रहेको पकाहामैनपुर गाउँपालिका कार्यसम्पादन मूल्याङ्कनमा सबैभन्दा कमजोर साबित भएको हो । पकाहामैनपुरमा तीन जना वडा सदस्य बाहेक अध्यक्ष, उपाध्यक्ष, पाँचै वडाध्यक्ष र वडा सदस्यमा समेत काँग्रेस विजयी भएको थियो ।

गाउँपालिकाको कमजोर प्रदर्शनले नेपाली काँग्रेस पर्साको नेतृत्व क्षमतामाथि गम्भीर प्रश्नहरू तेर्सिएको छ । एउटै जिल्लाका दुई गाउँपालिकाहरूको कार्यसम्पादनमा आएको अत्यधिक अन्तरले स्थानीय सरकारको कार्यक्षमतामा नेतृत्वको मुख्य भूमिका हुने देखाएको छ ।

कार्यसम्पादन मूल्याङ्कन सार्वजनिक भएपछि नेपाली काँग्रेस पर्साका पूर्व सभापति अजय द्विवेदीले सामाजिक सञ्जालमार्फत पार्टी नेतृत्वमाथि गम्भीर प्रश्नहरू उठाएका छन् । पार्टीले आन्तरिक समीक्षा गर्नुपर्ने बताउँदै उनले लेखेका छन् – “राष्ट्रिय प्राकृतिक स्रोत तथा वित्त आयोगद्वारा गरिएको मूल्याङ्कनमा सम्पूर्ण वडासहित प्रचण्ड बहुमतसहित निर्वाचित पकाहामैनपुर गाउँपालिका प्रदेशमै निम्न स्तरमा रहेकोमा पार्टीको केही जिम्मेवारी हुन्छ कि? पार्टी टिकट झ्याल मात्र हो? जनतासँग पार्टीको नाममा भोट माग्ने तर काममा असफलताको जिम्मेवारी नलिने? मनन गरौँ, जनता सर्वोपरि हो!”

कुनै समय नेपाली काँग्रेस पर्सा जिल्लाकै सबैभन्दा शक्तिशाली पार्टी थियो, तर आज पार्टी कमजोर बन्दै गएको छ । स्थानीय तहमा राम्रो नतिजा ल्याउन सक्ने ठाउँमा समेत ध्यान नदिँदा कार्यसम्पादन मूल्याङ्कनमा कमजोर अङ्क आउनु पार्टीकै लागि लज्जाको विषय बन्नुपर्ने हो । तर, पार्टीको नेतृत्व मौन छ ।

द्विवेदीले पार्टीको वर्तमान नेतृत्वको गलत निर्णयहरूकै कारण सङ्गठन कमजोर बन्दै गएको सङ्केत गरेका छन् । उनले नेपाली काँग्रेस नेतृत्वले यस विषयमा आधिकारिक धारणा सार्वजनिक नगर्नु र आन्तरिक समीक्षा नगर्नु गम्भीर कमजोरी भएको औँल्याएका छन् ।

अजय द्विवेदी नेपाली काँग्रेस पर्साका पूर्व जिल्ला सभापति हुन् । गत आम निर्वाचनमा पार्टीबाट टिकट नपाएपछि उनले पर्सा क्षेत्र नम्बर १ बाट प्रतिनिधिसभा सदस्य पदका लागि स्वतन्त्र उम्मेदवारी दिएका थिए । उनीमाथि पार्टीले कारबाही समेत गरेको छ ।

नेपाली काँग्रेस नेतृत्वले हालसम्म पकाहामैनपुर गाउँपालिकाको कमजोर प्रदर्शनबारे कुनै आधिकारिक धारणा सार्वजनिक गरेको छैन । स्थानीय तहमा पार्टीको पकड मजबुत हुँदाहुँदै पनि राम्रो शासन दिन नसक्नु काँग्रेसकै कमजोरी रहेको आलोचकहरूको भनाइ छ ।

यद्यपि, काँग्रेसकै नेतृत्वमा रहेको अर्को गाउँपालिका पटेर्वासुगौलीले भने राम्रो प्रदर्शन गरेको छ । कार्यसम्पादन मूल्याङ्कनमा पटेर्वासुगौली गाउँपालिकाले मधेस प्रदेशमै दोस्रो स्थान हासिल गरेको छ । पटेर्वासुगौलीमा अध्यक्ष र उपाध्यक्ष दुवै नेपाली काँग्रेसबाट निर्वाचित छन् । तर, त्यहाँ पकाहामैनपुर जस्तो काँग्रेसको पूर्ण बहुमत छैन ।

पकाहामैनपुर गाउँपालिकामा भ्रष्टाचारका आरोपहरू बाहिरिनु, योजनाहरूको अव्यवस्थित कार्यान्वयन, र जनअपेक्षालाई बेवास्ता गरिनु जस्ता कारणहरूले जनता निराश भएको देखिन्छ । गाउँपालिकाले शिक्षा, स्वास्थ्य, पूर्वाधार, रोजगारी सिर्जनामा महत्त्वपूर्ण सुधार गर्न सकेको छैन । फलस्वरूप पकाहामैनपुर कार्यसम्पादन मूल्याङ्कनमा फेल भएको देखिन्छ ।

गाउँपालिकाको कमजोर प्रदर्शन काँग्रेसका लागि राजनीतिक नैतिकताको विषय बनेको छ । स्थानीय तहको चुनावमा मतदाताहरूले काँग्रेसलाई अत्यधिक विश्वास दिए पनि नेतृत्वले नागरिकको विश्वासको कदर गर्न नसकेको कार्यसम्पादन मूल्याङ्कनको अङ्कले प्रस्ट हुन्छ ।

अहिले पार्टीभित्रै उठेका गम्भीर प्रश्नहरूले काँग्रेसका लागि आगामी निर्वाचनमा चुनौती थप्न सक्छ । जनताको भोट लिएर सत्तामा पुगे पनि काममा असफल हुने परिपाटी कायम रह्यो भने, आगामी चुनावहरूमा काँग्रेसले जनताको म्यान्डेट गुमाउन सक्छ ।

नेपाली काँग्रेसले पकाहामैनपुर गाउँपालिकाको कमजोर प्रदर्शनलाई गम्भीर रूपमा नलिने हो भने, स्थानीय र राष्ट्रिय तहमा पार्टीको लोकप्रियता थप घट्ने सम्भावना देखिन्छ ।

“काम नगर्ने नेतृत्वलाई कारबाही गर्ने कि अझै पनि पार्टीभित्र मौन रहने?” अहिले काँग्रेसभित्र उठिरहेको मुख्य प्रश्न बनेको छ ।