वीरगञ्ज । नारायणी अस्पताल वीरगञ्जमा कार्यरत चिकित्सक तथा स्वास्थ्यकर्मीहरू अन्य अस्पतालमा काजमा गई कार्यरत रहेकाले सेवा प्रवाहमा गम्भीर असर परेको छ। अस्पताल प्रशासनका अनुसार हालसम्म ३४ जना चिकित्सक तथा स्वास्थ्यकर्मी काजमा गएर अन्य अस्पतालमा कार्यरत छन्, तर स्वास्थ्य मन्त्रालयले उनीहरूलाई फिर्ता पठाउन आनाकानी गरिरहेको छ।
नारायणी अस्पतालमा रेडियोलोजिस्ट, ग्यास्ट्रोलोजिस्ट, नेफ्रोलोजिस्ट, डेन्टल सर्जन, छालारोग विशेषज्ञ, ईएनटी सर्जन, ट्रपिकल फिजिसियन, एनेस्थेसियोलोजिस्ट लगायतका विशेषज्ञ चिकित्सकहरूको अभावले बिरामीहरू मर्कामा परेका छन्। अस्पतालमा बिरामीहरूको चाप बढ्दो भए पनि आवश्यक चिकित्सक र स्वास्थ्यकर्मी नहुँदा सेवा प्रवाहमा समस्या उत्पन्न भएको छ।
हाल रेडियोलोजिस्ट डा. पुष्पराज अधिकारी बिरामी बिदामा रहेका छन् भने अर्का रेडियोलोजिस्ट डा. दिवस सापकोटा भरतपुर अस्पतालमा काजमा छन्। ग्यास्ट्रोलोजिस्ट डा. अरुण ज्ञवाली लुम्बिनी प्रदेशको मुख्यमन्त्री कार्यालयमा, नेफ्रोलोजिस्ट डा. नीरज ढकाल वीर अस्पतालमा तथा डेन्टल सर्जन डा. वर्षा थापा लुम्बिनी प्रदेशमा काजमा छन्। यसैगरी, छालारोग विशेषज्ञ डा. आनन्द नेपाल पोखरा क्षेत्रीय अस्पतालमा, अर्थोपेडिक सर्जन डा. भरतबहादुर खत्री अज्ञात स्थानमा तथा ईएनटी सर्जन डा. सोनिकाधारी श्रेष्ठ वीर अस्पतालमा कार्यरत छन्।
नारायणी अस्पतालका मेडिकल सुपरिटेन्डेन्ट डा. चुमनलाल दासका अनुसार मन्त्रालयलाई काजमा गएका चिकित्सकहरूलाई फिर्ता पठाउन पटक–पटक अनुरोध गरिएको छ, तर हालसम्म कुनै पहल भएको छैन। उनले आवश्यक चिकित्सकका लागि दुई पटक आवेदन आह्वान गरिए पनि चिकित्सकहरूले चासो नदेखाएको बताए।
अस्पताल प्रशासनले चिकित्सक अभावका कारण सेवाग्राहीलाई असर परेको बताउँदै स्वास्थ्य मन्त्रालय र स्थानीय जनप्रतिनिधिहरूलाई शीघ्र समाधानका लागि पहल गर्न आग्रह गरेको छ।
