वीरगञ्ज । बारा प्रहरीले पाँच किलो अफिम जस्तो देखिने लागूऔषधसहित एक जनालाई नियन्त्रणमा लिएको छ ।

विशेष सूचनाको आधारमा इलाका प्रहरी कार्यालय अमलेखगञ्जबाट खटिएको प्रहरी टोलीले बारा, जीतपुरसिमरा उप-महानगरपालिका – २१ स्थित अमलेखगञ्ज चोकमा चेकजाँच गर्ने क्रममा उक्त लागूऔषध बरामद गरेको हो ।

प्रहरीका अनुसार, बिहीबार बिहान इलाका प्रहरी कार्यालय अमलेखगञ्जबाट प्रहरी वरिष्ठ नायव निरीक्षक (वरिष्ठ सई) टेक बहादुर कार्कीको कमान्डमा गएको टोलीले हेटौडाबाट वीरगञ्जतर्फ गइरहेको बा ३६ प २७१४ नम्बरको १५० सिसीको पल्सर मोटरसाइकललाई रोकी चेकजाँच गर्दा सिट मुनी लुकाई राखेको अवस्थामा उक्त लागूऔषध फेला परेको थियो ।
घटनामा संलग्न भएको आरोपमा प्रहरीले मकवानपुर जिल्लाको कैलाश गाउँपालिका–६, गोगने निवासी अन्दाजी २५ वर्षीय भुवन सिंह थिङलाई पक्राउ गरेको छ । हाल उनलाई नियन्त्रणमा राखेर आवश्यक कानुनी प्रक्रिया अघि बढाइएको प्रहरीले जनाएको छ ।